ആലപ്പുഴ: പാലക്കാട്ടെ രാഷ്ട്രീയ കൊലപാതകങ്ങളില്‍ സര്‍ക്കാരിനെ പ്രതിരോധിച്ച് സി പി ഐ സംസ്ഥാന സെക്രട്ടറി കാനം രാജേന്ദ്രന്‍. രണ്ട് വര്‍ഗീയ സംഘടനകള്‍ ഏറ്റുമുട്ടുന്നിടത്ത് സര്‍ക്കാരിന് എന്തുകാര്യം എന്നാണ് കാനം രാജേന്ദ്രന്‍ ചോദിച്ചത്. വര്‍ഗീയ സംഘടനകളെ ജനങ്ങള്‍ക്കുമുന്നില്‍ തുറന്നുകാട്ടേണ്ടത് മാധ്യമങ്ങളുടെ ഉത്തരവാദിത്വമാണെന്നും ഇത്തരം ശക്തികള്‍ക്കെതിരായി ശക്തമായ നിലപാട് സ്വീകരിക്കാന്‍ മാധ്യമങ്ങള്‍ തയാറാകണമെന്നും കാനം രാജേന്ദ്രന്‍ പറഞ്ഞു. ആലപ്പുഴയില്‍ എ ഐ എസ് എഫ് സംസ്ഥാന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
'വര്‍ഗീയ സംഘടനകള്‍ ഏറ്റുമുട്ടുമ്പോള്‍ എങ്ങനെയാണ് സര്‍ക്കാര്‍ കുറ്റക്കാരാവുന്നത്? എന്തുസംഭവിച്ചാലും സര്‍ക്കാരാണ് കുറ്റക്കാര്‍ എന്ന നിലപാട് ശരിയല്ല. വര്‍ഗീയ സംഘങ്ങള്‍ സര്‍ക്കാരിനെയോ പൊലീസിനെയോ അറിയിച്ചിട്ടല്ല കൊലപാതകങ്ങളും അക്രമങ്ങളും നടത്തുന്നത്. അത്തരം സംഭവങ്ങള്‍ ഉണ്ടാവാതിരിക്കാനാണ് ശ്രമിക്കേണ്ടത്. ഉണ്ടായാല്‍ ആ പ്രതികളെ നിയമത്തിനുമുന്നില്‍ കൊണ്ടുവരികയാണ് സര്‍ക്കാര്‍ ചെയ്യേണ്ടത്. അത് സര്‍ക്കാര്‍ ചെയ്യും.'- കാനം രാജേന്ദ്രന്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
പാലക്കാട്ടെ കൊലപാതകങ്ങളെ രാഷ്ട്രീയ കൊലപാതകങ്ങളെന്ന് വിളിക്കരുതെന്നും അത് വര്‍ഗീയ കൊലപാതകങ്ങളാണെന്നും കാനം പറഞ്ഞു. ആര്‍ എസ് എസിനെതിരെയും എസ് ഡി പി ഐക്കെതിരെയും മാധ്യമങ്ങള്‍ ഒന്നും പറയുന്നില്ല. പൊലീസിനെയും സര്‍ക്കാരിനെയും മാത്രമാണ് വിമര്‍ശിക്കുന്നത്. വര്‍ഗീയ സംഘടനകള്‍ക്ക് മതനിരപേക്ഷ കേരളത്തില്‍ സ്ഥാനമില്ല. അവരെ ഒറ്റപ്പെടുത്തുന്ന നിലപാടാണ് മാധ്യമങ്ങള്‍ സ്വീകരിക്കേണ്ടത് എന്നും കാനം രാജേന്ദ്രന്‍ കൂട്ടിച്ചേര്‍ത്തു.
