മുംബൈ: കൊറോണ വ്യാപനത്തിനെതിരെ കയ്യടിച്ചതുകൊണ്ടോ വിളക്കു കത്തിച്ചതുകൊണ്ടോ കാര്യമില്ലെന്ന് പ്രധാനമന്ത്രിക്ക് ശിവസേന മുഖപത്രമായ സാമ്നയുടെ ഉപദേശം. മുഖപ്രസംഗത്തിലൂടെയാണ് പ്രധാനമന്ത്രി നരേന്ദ്ര മോദിയെ രൂക്ഷമായി വിമര്‍ശിച്ചത്.
ഇത്തരം ആഹ്വാനങ്ങളിലൂടെ എന്താണ് പ്രധാനമന്ത്രി അര്‍ഥമാക്കുന്നത് എന്ന് വ്യക്തമാക്കണം. കയ്യടിയും വിളക്കു കത്തിക്കലും തുടര്‍ന്നാല്‍ കൊറോണക്കെതിരായ ഈ യുദ്ധത്തില്‍ തോറ്റു പോയേക്കുമെന്നും പ്രധാനമന്ത്രിയുടെ ആഹ്വാനങ്ങളെ ജനങ്ങള്‍ തെറ്റായി വ്യാഖ്യാനിക്കാന്‍ ഇടവരുമെന്നും സാമ്നയുടെ മുഖപ്രസംഗം പറയുന്നു. ഇത്തരം ആഹ്വാനങ്ങള്‍ ജനങ്ങള്‍ ആഘോഷമാക്കുമെന്നും മുഖപ്രസംഗം ചൂണ്ടിക്കാട്ടി.
തബലീഗുകാരെ വിമര്‍ശിക്കുന്നവര്‍ നിയമം പാലിക്കുന്നവരാണോ ?
നിയമലംഘനം ആരു നടത്തിയാലും ശക്തമായ നടപടി സ്വീകരിക്കണം. രാജ്യത്ത് തബലീഗ് ജമാത്തുകാര്‍ മാത്രമല്ല നിയമം ലലംഘിച്ച് സമ്മേളനം നടത്തിയത്. അവരെ വിമര്‍ശിക്കുന്നവര്‍ നിയമങ്ങള്‍ നേരാംവണ്ണം അനുസരിക്കുന്നവരാണോ എന്ന് ആലോചിക്കണമെന്നും സാമ്ന മുഖപ്രസംഗത്തില്‍ പറഞ്ഞു.
