ചെന്നൈ: നികുതി അടയ്ക്കുന്നതില്‍ വീഴ്ച്ച വരുത്തിയ സംഗീത സംവിധായകന്‍ ഇളയരാജയ്ക്ക് ജി എസ് ടി വകുപ്പ് നോട്ടീസയച്ചു. ഡയറക്ടറേറ്റ് ജനറല്‍ ഓഫ് ഗുഡ്‌സ് ആന്‍ഡ് സര്‍വീസസ് ടാക്‌സ് ഇന്റലിജന്‍സ് ചെന്നൈ സോണല്‍ യൂണിറ്റാണ് ഇളയരാജയ്ക്ക് നോട്ടീസയച്ചത്. 2013-15 കാലയളവില്‍ സിനിമകളില്‍ സംഗീതമൊരുക്കിയതിന് ലഭിച്ച പ്രതിഫലത്തിന്റെ നികുതിയായ 1. 87 കോടി രൂപയാണ് ഇളയരാജ അടയ്‌ക്കേണ്ടിയിരുന്നത്. 1944-ലെ സെന്‍ട്രല്‍ എക്‌സൈസ് നിയമത്തിലെ സെക്ഷന്‍ 14, ഫിനാന്‍സ് ആക്ട് സെക്ഷന്‍ 83, ചരക്ക് സേവന നികുതി സെക്ഷന്‍ 174, 70 എന്നീ വകുപ്പുകള്‍ പ്രകാരമാണ് ഇളയരാജയ്ക്ക് നോട്ടീസയച്ചിരിക്കുന്നത്.
നികുതിയടയ്ക്കണമെന്നാവശ്യപ്പെട്ട് ജിഎസ്ടി ഓഫീസില്‍ നിന്ന് അദ്ദേഹത്തിന് രണ്ടുതവണ നോട്ടീസയച്ചിരുന്നു. ഫെബ്രുവരി 28-ന് ചെന്നൈ സോണല്‍ ഓഫീസില്‍ ഹാജരാകാനാവശ്യപ്പെട്ടാണ് ആദ്യത്തെ സമന്‍സ് അയക്കുന്നത്. മാര്‍ച്ച് പത്തിന് ബന്ധപ്പെട്ട രേഖകളുമായി ഹാജരാകണമെന്നായിരുന്നു ആവശ്യം. എന്നാല്‍ ഇളയരാജ നോട്ടീസിനോട് പ്രതികരിച്ചില്ല. തുടര്‍ന്ന് സീനിയര്‍ ഇന്റലിജന്‍സ് ഓഫീസര്‍ ഒപ്പിട്ട നോട്ടീസ് മാര്‍ച്ച് 21-ന് അയച്ചു. ബന്ധപ്പെട്ട രേഖകളുമായി മാര്‍ച്ച് 28-നകം ജിഎസ്ടി വകുപ്പുമായി ബന്ധപ്പെടണമെന്നായിരുന്നു നിര്‍ദേശം. രണ്ടാമത് അയച്ച നോട്ടീസിനോടും പ്രതികരിക്കാതിരുന്നതോടെയാണ് ജിഎസ്ടി വകുപ്പ് ഇളയരാജയ്ക്ക് കാരണംകാണിക്കല്‍ നോട്ടീസയച്ചിരിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അതേസമയം, അടുത്തിടെ പ്രധാനമന്ത്രി നരേന്ദ്രമോദിയെ പുകഴ്ത്തി, അദ്ദേഹത്തെ ബി ആര്‍ അംബേദ്കറുമായി താരതമ്യം ചെയ്തുളള ഇളയരാജയുടെ പരാമര്‍ശം വലിയ വിവാദമായിരുന്നു. നികുതിക്കേസില്‍ നിന്ന് രക്ഷപ്പെടാനാണ് അദ്ദേഹം മോദിസ്തുതി നടത്തിയതെന്ന തരത്തില്‍ ആരോപണങ്ങള്‍ ഉയര്‍ന്നിരുന്നു. തുടര്‍ന്ന് പ്രധാനമന്ത്രി നരേന്ദ്രമോദി ഇളയരാജയെ ഫോണില്‍ വിളിച്ച് നന്ദി പറയുകയും ചെയ്തു. ഇളയരാജയ്ക്ക് ഭാരതരത്‌നം നല്‍കണമെന്ന് തമിഴ്‌നാട് ബിജെപി അധ്യക്ഷന്‍ അണ്ണാമലെയും ആവശ്യപ്പെട്ടിരുന്നു.
