കൊച്ചി: ബലാത്സംഗ ആരോപണം നേരിട്ടതിനുപിന്നാലെ ഒളിവില്‍പോയ നിര്‍മ്മാതാവും നടനുമായ വിജയ് ബാബുവിനെ കണ്ടെത്താന്‍ ഇന്റര്‍പോളിന്റെ സഹായംതേടി പൊലീസ്. വിജയ് ബാബുവിനെ കണ്ടെത്താനായി ബ്ലൂ കോര്‍ണര്‍ നോട്ടീസ് പുറപ്പെടുവിക്കാനായി ഇന്റര്‍പോളിന്റെ സഹായം തേടാനാണ് നീക്കം. അതിനായുളള അന്തിമ നടപടികള്‍ പൂര്‍ത്തിയായിട്ടുണ്ട്. ബ്ലൂ കോര്‍ണര്‍ നോട്ടീസ് അയക്കുന്നതിലൂടെ ദുബായ് പൊലീസിന് പ്രതിയുടെ ഒളിത്താവളം കണ്ടെത്താനും ആവശ്യമെങ്കില്‍ അറസ്റ്റ് ചെയ്യാനും സാധിക്കും. വിജയ് ബാബു ദുബായില്‍തന്നെയാണ് എന്നാണ് ലഭിക്കുന്ന വിവരം.
കഴിഞ്ഞ തിങ്കളാഴ്ച്ച കീഴടങ്ങണമെന്നാവശ്യപ്പെട്ട് പൊലീസ് വിജയ് ബാബുവിന് മെയില്‍ അയച്ചിരുന്നു. എന്നാല്‍ മെയ് 19-നുശേഷം ഹാജരാകാമെന്നായിരുന്നു വിജയ് ബാബു പൊലീസിന് നല്‍കിയ മറുപടി. ഇതോടെയാണ് വിജയ് ബാബുവിനെ കണ്ടെത്താനായി പൊലീസ് ഇന്റര്‍പോളിന്റെ സഹായം തേടിയത്.
എന്താണ് ഇന്റര്‍പോള്‍, ബ്ലു കോര്‍ണര്‍ നോട്ടീസ്
ലോകമെമ്പാടുമുളള പൊലീസുകാര്‍ തമ്മിലുളള സഹകരണത്തിനും, അതുവഴി കുറ്റകൃത്യങ്ങള്‍ നിയന്ത്രിക്കുന്നതിനുമുളള അന്താരാഷ്ട്ര സംഘടനയാണ് ഇന്റര്‍പോള്‍. ഫ്രാന്‍സ് ആസ്ഥാനമായി പ്രവര്‍ത്തിക്കുന്ന ഇന്റര്‍പോളിന് ലോകത്താകെ ഏഴ് പ്രാദേശിക ബ്യൂറോകളും 194 രാജ്യങ്ങളിലായി സെന്‍ട്രല്‍ ബ്യൂറോകളുമുണ്ട്. ലോകത്തിലെ ഏറ്റവും വലിയ പൊലീസ് സംഘടനയാണ് ഇന്റര്‍പോള്‍.
ഇന്റര്‍പോള്‍ നൽകുന്ന ഒരു അന്താരാഷ്ട്ര അലേർട്ടാണ് ഇന്റർപോൾ നോട്ടീസ്. ഒരു അംഗരാജ്യത്തിലെ (അല്ലെങ്കിൽ ഒരു അംഗീകൃത അന്തർദ്ദേശീയ സ്ഥാപനത്തിലെ) കുറ്റകൃത്യങ്ങൾ, കുറ്റവാളികൾ, ഭീഷണികൾ എന്നിവയെക്കുറിച്ചുള്ള വിവരങ്ങൾ ലോകമെമ്പാടുമുള്ള പോലീസ് സംവിധാനങ്ങളുമായി ആശയവിനിമയം നടത്താനായണ് നോട്ടീസ് ഉപയോഗിക്കുന്നത്. ഗുരുതരമായ കുറ്റകൃത്യങ്ങൾ ചെയ്തവർ, കാണാതായവർ, അജ്ഞാത മൃതദേഹങ്ങൾ, ജയിൽ ചാടിയ കുറ്റവാളികൾ തുടങ്ങിയവരെ കണ്ടെത്താനായി അറിയിപ്പുകളിലൂടെ അംഗ രാജ്യങ്ങളിലെ നിയമ സംവിധാനങ്ങൾക്ക് വിവരം നൽകും.
എട്ട് തരം അറിയിപ്പുകൾ ഉണ്ട്, അവയിൽ ഏഴെണ്ണം അവയുടെ പ്രവർത്തനം അനുസരിച്ച് വർണ്ണാധിഷ്ഠിതമാണ്: ചുവപ്പ്, നീല, പച്ച, മഞ്ഞ, കറുപ്പ്, ഓറഞ്ച്, പർപ്പിൾ എന്നിവയാണവ. റെഡ് നോട്ടീസാണ് ഏറ്റവും പ്രധാനപ്പെട്ട അറിയിപ്പ്. കുറ്റവാളിയെ കണ്ടെത്താനും അറസ്റ്റ് ചെയ്യാനും അനുവാദമുള്ള ഉന്നത നോട്ടീസാണ് റെഡ് കോർണർ നോട്ടീസ്. ക്രിമിനല്‍ കേസില്‍ പ്രതികളായ വ്യക്തികളെ കണ്ടെത്തുന്നതിനായാണ് ബ്ലു കോര്‍ണര്‍ നോട്ടീസ് നല്‍കുന്നത്‌.
ഗ്രീന്‍ കോര്‍ണര്‍ നോട്ടീസ് ഒരു വ്യക്തി പൊതുസുരക്ഷയ്ക്ക് ഭീഷണിയാകുമെങ്കില്‍ അയാളുടെ ക്രിമിനല്‍ പ്രവര്‍ത്തനങ്ങളെക്കുറിച്ച് മുന്നറിയിപ്പ് നല്‍കുന്നതിനായാണ് ഉപയോഗിക്കുന്നത്. യെല്ലോ നോട്ടീസ് കാണാതായ ഒരാളെ കണ്ടെത്തുന്നതിനും സ്വയം തിരിച്ചറിയാന്‍ സാധിക്കാത്ത ഒരു വ്യക്തിയെ തിരിച്ചറിയാനുമായി ഉപയോഗിക്കുന്നു. ബ്ലാക്ക് നോട്ടീസ് അജ്ഞാത മൃതദേഹങ്ങളെക്കുറിച്ചുളള വിവരം തേടുന്നതിനായാണ് ഉപയോഗിക്കുക. ഓറഞ്ച് നോട്ടീസ് ഒരു സംഭവത്തെക്കുറിച്ച് മുന്നറിയിപ്പ് നല്‍കാനായി പുറപ്പെടുവിക്കുന്നതാണ്. പര്‍പ്പിള്‍ നോട്ടീസ് കുറ്റവാളികളെക്കുറിച്ചും അവരുടെ ഒളിത്താവളങ്ങളെക്കുറിച്ചും വിവരം നല്‍കുന്നതിന് ഉപയോഗിക്കുന്നു.
ഇന്റർപോൾ പ്രസിദ്ധീകരിക്കുന്ന നോട്ടീസുകൾ അവരുടെ സ്വന്തം മുൻകൈയിൽ അല്ലെങ്കിൽ അംഗരാജ്യങ്ങളുടെ ദേശീയ കേന്ദ്ര ബ്യൂറോകളിൽ (എൻ‌സി‌ബികൾ) അല്ലെങ്കിൽ ഐക്യരാഷ്ട്രസഭ, അന്താരാഷ്ട്ര ക്രിമിനൽ കോടതി പോലുള്ള അംഗീകൃത അന്താരാഷ്ട്ര സ്ഥാപനങ്ങളിൽ നിന്നുള്ള അഭ്യർ‌ത്ഥനകളെ അടിസ്ഥാനമാക്കിയുള്ളതാണ്. എല്ലാ അറിയിപ്പുകളും ഇന്റർപോളിന്റെ സുരക്ഷിത വെബ്‌സൈറ്റിൽ പ്രസിദ്ധീകരിക്കും. അഭ്യർത്ഥിക്കുന്നവർ സമ്മതിച്ചാൽ അറിയിപ്പുകളുടെ എക്‌സ്‌ട്രാക്റ്റുകൾ ഇന്റർപോളിന്റെ പൊതു വെബ്‌സൈറ്റിലും പ്രസിദ്ധീകരിക്കാം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
