കൊച്ചി: നടിയെ ആക്രമിച്ച കേസില് പുനരന്വേഷണം അവസാനിപ്പിക്കുന്നു. കേസിലെ അധിക കുറ്റപത്രം ഈ മാസം 31-ന് സമര്പ്പിക്കും. അന്വേഷണ സംഘം തുടരന്വേഷണത്തിനായി അധിക സമയം നീട്ടിച്ചോദിക്കില്ല എന്നാണ് ലഭിക്കുന്ന വിവരം. കേസില് നടി കാവ്യാമാധവനെതിരെ തെളിവുകളില്ലെന്നാണ് അന്വേഷണ സംഘത്തിന്റെ കണ്ടെത്തല്. അതിനാല് കാവ്യ കേസില് പ്രതിയാകില്ല. ദിലീപിന്റെ അഭിഭാഷകരെയും കേസില്നിന്ന് ഒഴിവാക്കും. ഈ മാസം 31-ന് മുന്പ് അന്വേഷണം പൂര്ത്തിയാക്കേണ്ടതുകൊണ്ടും ഉന്നത തലത്തില്നിന്നുളള സമ്മര്ദ്ദവുമാണ് കേസന്വേഷണം അവസാനിപ്പിക്കാന് കാരണം എന്ന് പറയപ്പെടുന്നു.
കേസ് അട്ടിമറിക്കാന് ദിലീപിന്റെ അഭിഭാഷകര് ശ്രമിച്ചിരുന്നതായി അന്വേഷണസംഘം ആരോപിച്ചിരുന്നു. സാക്ഷികളെ സ്വാധീനിക്കാന് ശ്രമിച്ചെന്നും അഭിഭാഷകരെ ചോദ്യംചെയ്യണമെന്നും അന്വേഷണ സംഘം ഹൈക്കോടതിയില് പറഞ്ഞിരുന്നു. എന്നാല് അഭിഭാഷകരുടെ മൊഴി പോലുമെടുക്കാതെയാണ് ക്രൈംബ്രാഞ്ച് കേസന്വേഷണം അവസാനിപ്പിക്കുന്നത്. ദിലീപിന്റെ സുഹൃത്ത് ശരത് മാത്രമാണ് അധികകുറ്റപത്രത്തില് പ്രതിസ്ഥാനത്തുണ്ടാവുക.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
സംവിധായകന് ബാലചന്ദ്രകുമാറിന്റെ വെളിപ്പെടുത്തലിനുപിന്നാലെയാണ് നടിയെ ആക്രമിച്ച കേസില് പുനരന്വേഷണം ആരംഭിച്ചത്. കേസ് അന്വേഷിച്ച ഉദ്യോഗസ്ഥരെ വധിക്കാന് ദിലീപും സംഘവും ഗൂഢാലോചന നടത്തി എന്നായിരുന്നു ബാലചന്ദ്രകുമാറിന്റെ വെളിപ്പെടുത്തല്. തുടരന്വേഷണത്തിന് ഉത്തരവ് നല്കിയ കോടതി, അന്വേഷണം നീട്ടിക്കൊണ്ടുപോകരുതെന്നും നിര്ദേശം നല്കിയിരുന്നു.
