മുംബൈ: അക്ഷയ് കുമാര്‍ ചിത്രം സാമ്രാട്ട് പൃഥ്വിരാജിന് കുവൈറ്റിലും ഒമാനിലും വിലക്ക്. ട്രേഡ് അനലിസ്റ്റ് ഗിരീഷ് ജോഹറിനെ ഉദ്ദരിച്ച് ഇന്ത്യാ ടുഡെയാണ് വാര്‍ത്ത റിപ്പോര്ട്ട് ചെയ്തിരിക്കുന്നത്. ഒമാന്‍, കുവൈറ്റ് സര്‍ക്കാരുകള്‍ അക്ഷയ് കുമാര്‍ ചിത്രം സാമ്രാട്ട് പൃഥ്വിരാജിന് വിലക്കേര്‍പ്പെടുത്തിയെന്നും ചിത്രം ഈ രാജ്യങ്ങളില്‍ പ്രദര്‍ശിപ്പിക്കില്ലെന്നുമാണ് ഗിരീഷ് ജോഹര്‍ ട്വിറ്ററില്‍ പങ്കുവെച്ച കുറിപ്പില്‍ പറയുന്നത്. എന്നാല്‍ എന്തിനാണ് ചിത്രത്തിന് വിലക്കേര്‍പ്പെടുത്തിയതെന്ന കാര്യം വ്യക്തമല്ല. 12-ാം നൂറ്റാണ്ടില്‍ പഴയ വടക്കുപടിഞ്ഞാറന്‍ ഇന്ത്യയിലെ രാജാവായിരുന്ന പൃഥ്വിരാജ് ചൗഹാന്റെ ജീവിതത്തെ ആസ്പദമാക്കിയുളള ചിത്രം നാളെ (ജൂണ്‍ 3) ന് തിയേറ്ററുകളിലെത്താനിരിക്കെയാണ് ഇരുരാജ്യങ്ങളും ചിത്രത്തിന് നിരോധനമേര്‍പ്പെടുത്തിയത്.
സാമ്രാട്ട് പൃഥ്വിരാജിന്റെ പ്രമോഷന്റെ ഭാഗമായി നടത്തിയ അഭിമുഖത്തില്‍ ഇന്ത്യന്‍ രാജാക്കന്മാരെക്കുറിച്ച് പാഠപുസ്തകങ്ങളില്‍ പഠിപ്പിക്കുന്നില്ലെന്നും മുഴുവന്‍ അധിനിവേശക്കാരെക്കുറിച്ചാണ് പറയുന്നത് എന്നുമുളള അക്ഷയ് കുമാറിന്റെ പ്രസ്താവന വലിയ വിവാദമായിരുന്നു. അതേസമയം, സാമ്രാട്ട് പൃഥ്വിരാജിന് യോഗി സര്‍ക്കാര്‍ നികുതി ഒഴിവാക്കി. സാധാരണ ജനങ്ങളിലേക്ക് സിനിമയെ എത്തിക്കാനായാണ് നികുതി ഒഴിവാക്കിയതെന്ന് യുപി മുഖ്യമന്ത്രി യോഗി ആദിത്യനാഥ് പറഞ്ഞു. കശ്മീര്‍ ഫയല്‍സിനുശേഷം ബിജെപി- ആര്‍എസ്എസ് അജണ്ട കടത്തിവിടാനായി നിര്‍മ്മിച്ച സിനിമയാണ് സാമ്രാട്ട് പൃഥ്വിരാജ് എന്ന തരത്തിലുളള വിമര്‍ശനങ്ങള്‍ സിനിമ റിലീസ് ചെയ്യുന്നതിനുമുന്‍പേ തന്നെ ഉയര്‍ന്നുവരുന്നുണ്ട്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അക്ഷയ് കുമാറും മാനുഷി ചില്ലറുമാണ് സാമ്രാട്ട് പൃഥ്വിരാജിലെ പ്രധാനകഥാപാത്രങ്ങളെ അവതരിപ്പിക്കുന്നത്. അക്ഷയ് കുമാര്‍ പൃഥ്വിരാജ് ചൗഹാനെ അവതരിപ്പിക്കുന്നു. ഭാര്യയായ സംയുക്തയുടെ വേഷമാണ് മാനുഷി ചില്ലര്‍ കൈകാര്യം ചെയ്യുന്നത്. സഞ്ജയ് ദത്ത്, സോനു സൂദ്, മാനവ് വിജ്, അശുതോഷ് റാണ, ലളിത് തിവാരി, ഗോവിന്ദ് പാണ്ഡെ, സാക്ഷി തന്‍വാര്‍, അജോയ് ചക്രവര്‍ത്തി തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
