തൃശൂര്: ഗുരുവായൂര് ക്ഷേത്രത്തിന് കാണിക്കയായി ലഭിച്ച മഹീന്ദ്രാ ഥാര് പുനര്ലേലം ചെയ്തു. റെക്കോര്ഡ് തുകയ്ക്കാണ് ലേലം ഉറപ്പിച്ചത്. മലപ്പുറം അങ്ങാടിപ്പുറം സ്വദേശിയും പ്രവാസി വ്യവസായിയുമായ വിഘ്നേഷ് വിജയകുമാറാണ് മഹീന്ദ്രാ ഥാര് സ്വന്തമാക്കിയത്. 43 ലക്ഷം രൂപയ്ക്കാണ് ലേലം ഉറപ്പിച്ചത്. ഇതിനുപുറമേ ജിഎസ്ടിയും നല്കണം. മേല്പ്പത്തൂര് ഓഡിറ്റോറിയത്തില് നടന്ന പുനര്ലേലത്തില് ആകെ പതിനഞ്ചുപേരാണ് പങ്കെടുത്തത്. 15 ലക്ഷമായിരുന്നു അടിസ്ഥാന വില.
മഹീന്ദ്രാ കമ്പനി ഡിസംബര് നാലിനാണ് ഗുരുവായൂര് ക്ഷേത്രത്തിന് വഴിപാടായി ഥാര് നല്കിയത്. വാഹനം ആ മാസം തന്നെ ദേവസ്വം ലേലത്തിന് വച്ചിരുന്നു. അന്ന് എറണാകുളം സ്വദേശിയായ അമല് മുഹമ്മദ് അലി എന്ന പ്രവാസി വ്യവസായി 15.10 ലക്ഷം രൂപയ്ക്കാണ് ഥാര് സ്വന്തമാക്കിയത്. എന്നാല് ലേലം നടന്നതിനുപിന്നാലെ വേണ്ടത്ര പ്രചാരണം നല്കാതെ ലേലം നല്കിയെന്നും ഒരാള് മാത്രം പങ്കെടുത്തിട്ടും ലേലം ഉറപ്പിച്ചെന്നും ആരോപിച്ച് ഹിന്ദു സേവാ സംഘം ഹൈക്കോടതിയെ സമീപിക്കുകയായിരുന്നു. ഇതോടെ ആദ്യത്തെ ലേലം റദ്ദാക്കി പുനര്ലേലം നടത്താന് കോടതി ഉത്തരവിടുകയായിരുന്നു. അമല് മുഹമ്മദ് പുനര്ലേലത്തില് പങ്കെടുത്തില്ല.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
വാഹനം സ്വന്തമാക്കിയ വിഘ്നേഷ് വിജയകുമാര് ദുബായിലെ വെല്ത്ത് ഐ ഗ്രൂപ്പ് ഓഫ് കമ്പനീസിന്റെ എംഡിയാണ്. വിഗ്നേഷ് ഗുരുവായൂരപ്പന്റെ ഭക്തനാണെന്നും നേരത്തെ നടന്ന ലേലത്തെക്കുറിച്ച് തങ്ങള് അറിഞ്ഞിരുന്നില്ലെന്നും ലേലത്തില് വിഘ്നേഷിനുവേണ്ടി പങ്കെടുത്ത അനൂപ് പറഞ്ഞു. വാഹനത്തിന് എത്ര രൂപയായാലും വാങ്ങണമെന്ന് തീരുമാനിച്ചിരുന്നെന്നും എല്ലാ മാസവും ഗുരുവായൂര് ദര്ശനം നടത്തുന്നവരാണ് തങ്ങളെന്നും വിഘ്നേഷിന്റെ പിതാവും പറഞ്ഞു.