തിരുവനന്തപുരം: സ്വര്ണ്ണക്കളളക്കടത്ത് കേസുമായി ബന്ധപ്പെട്ട് പുതിയ ആരോപണങ്ങളും പ്രതിഷേധങ്ങളുമുയരുന്ന സാഹചര്യത്തില് പ്രതികരണവുമായി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. മുഖ്യമന്ത്രിയെയും കുടുംബത്തെയും ലക്ഷ്യമിട്ട് സംഘടിത ആക്രമണങ്ങളാണ് നടക്കുന്നതെന്ന് കോടിയേരി ബാലകൃഷ്ണന് പറഞ്ഞു. കലാപമുണ്ടാക്കാന് ശ്രമിച്ചാല് മുഖ്യമന്ത്രി രാജിവെക്കുകയില്ല പകരം ജനങ്ങളെ അണിനിരത്തി നേരിടും. സ്വപ്നാ സുരേഷിന്റെ ആരോപണങ്ങള്ക്കുപിന്നില് രാഷ്ട്രീയ ഗൂഢാലോചനയുണ്ടെന്നും അത്തരം ആരോപണങ്ങള്ക്ക് അല്പ്പായുസ് മാത്രമേ ഉണ്ടാവുകയുളളു എന്നും അദ്ദേഹം പറഞ്ഞു. തിരുവനന്തപുരത്ത് നടത്തിയ വാര്ത്താ സമ്മേളനത്തിലായിരുന്നു കോടിയേരിയുടെ പ്രതികരണം.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
'പഴയ വിവാദങ്ങള് കുത്തിപ്പൊക്കുന്നതിനുപിന്നില് രാഷ്ട്രീയ ലക്ഷ്യമാണ്. കലാപവും സംഘര്ഷവും സൃഷ്ടിച്ച് രാഷ്ട്രീയ അസ്ഥിരതയുണ്ടാക്കാനാണ് ശ്രമം. സര്ക്കാര് ഇത്തരം കളളകഥകള്ക്കും കലാപങ്ങള്ക്കും കീഴടങ്ങില്ല. ജനങ്ങളെ അണിനിരത്തി രാഷ്ട്രീയ പ്രചാരണം നടത്തും.സ്വപ്നയുടെ മൊഴികള് മുഴുവന് വൈരുദ്ധ്യങ്ങളാണ്. ആദ്യം ശിവശങ്കറിന് സ്വര്ണ്ണക്കടത്തില് പങ്കില്ലെന്ന് പറഞ്ഞു. പിന്നീട് അത് മാറ്റിപ്പറഞ്ഞു. മുഖ്യമന്ത്രിക്കെതിരെ മൊഴി നല്കാന് നിര്ബന്ധിക്കുന്നു എന്ന് പറഞ്ഞു. ഇപ്പോള് അതും മാറ്റിപ്പറയുന്നു. അവരുടെ മൊഴികള് എത്രത്തോളം വിശ്വസനീയമാണെന്ന് കോടതിയാണ് പരിശോധിക്കേണ്ടത്'-കോടിയേരി ബാലകൃഷ്ണന് കൂട്ടിച്ചേര്ത്തു.
