കഴിഞ്ഞ 24 മണിക്കൂറിനുള്ളിൽ 678 പുതിയ കേസുകൾ റിപ്പോർട്ട് ചെയ്തതോടെ ഇന്ത്യയിൽ കൊറോണ വൈറസ് കേസുകളുടെ എണ്ണം 6412 ആയി ഉയർന്നതായി കേന്ദ്ര ആരോഗ്യ മന്ത്രാലയത്തിന്റെ ഏറ്റവും പുതിയ കണക്കുകൾ വ്യക്തമാക്കുന്നു. മരണസംഖ്യ 199 ആയി ഉയർന്നപ്പോൾ 503 പേര്‍ രോഗമുക്തി നേടി. 1,364 രോഗികളുള്ള മഹാരാഷ്ട്രയാണ് കൊവിഡ്-19 ഏറ്റവും കൂടുതൽ ബാധിച്ച സംസ്ഥാനം. തമിഴ്‌നാട്ടില്‍ 834, ദില്ലിയില്‍ 720, രാജസ്ഥാനില്‍ 463, തെലങ്കാനയില്‍ 442-ഉം രോഗികള്‍ ഉണ്ട്.
കൊറോണ വൈറസ് രോഗികളെ കണ്ടെത്തുന്നതിനായി ഇതുവരെ 1.3 ലക്ഷം സാമ്പിളുകൾ പരിശോധിച്ചതായി ഐസിഎംആർ അറിയിച്ചു. ആകെയുള്ള 6412 കേസുകളിൽ നിലവിൽ ചികിത്സയിലുള്ളത് 5709 പേരാണ്. 504 പേർ ചികിത്സ കഴിഞ്ഞ് സുഖം പ്രാപിച്ച് വീട്ടിലേക്ക് മടങ്ങി. കഴിഞ്ഞ 12 മണിക്കൂറിനുള്ളിൽ രാജ്യത്ത് 30 പേരാണ് കൊവിഡ്-19 ബാധിച്ച് മരിച്ചത്. ഇതിൽ 25 പേര്‍ മഹാരാഷ്ട്രയിലും മൂന്നു പേർ ഡൽഹിയിലും ഒരാൾ ഗുജറാത്തിലുമാണ് മരിച്ചത്.
