ഡല്ഹി: മഹാരാഷ്ട്രയിലെ പ്രതിസന്ധി രാഷ്ട്രപതി തെരഞ്ഞെടുപ്പ് മുന്നില്കണ്ടുളള ബിജെപിയുടെ തന്ത്രമാണെന്ന് മുതിര്ന്ന കോണ്ഗ്രസ് നേതാവ് മല്ലികാര്ജുന് ഖാര്ഗെ. മഹാരാഷ്ട്രയിലെ സര്ക്കാരിനെ താഴെയിറക്കി ഭരണം പിടിക്കാനും രാഷ്ട്രപതി തെരഞ്ഞെടുപ്പില് അക്കം തികയ്ക്കാനുമാണ് ബിജെപി ശ്രമിക്കുന്നതെന്നും മഹാ വികാസ് അഘാഡിക്കൊപ്പമാണ് കോണ്ഗ്രസെന്നും മല്ലികാര്ജുന് ഖാര്ഗെ പറഞ്ഞു. ഉദ്ദവ് താക്കറെ പക്ഷത്തിന് പിന്തുണ പ്രഖ്യാപിച്ച് എന് സി പിയും രംഗത്തെത്തിയിട്ടുണ്ട്. ഉദ്ദവ് താക്കറെയെ തങ്ങള് പൂര്ണമായും പിന്തുണയ്ക്കുന്നുണ്ടെന്നും സര്ക്കാരിനെ രക്ഷിക്കാനായി കഴിയുന്നതെല്ലാം ചെയ്യുമെന്നും മഹാരാഷ്ട്ര ഉപമുഖ്യമന്ത്രിയും എന്സിപി നേതാവുമായ അജിത് പവാര് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ബിജെപിയെയും വിമത എംഎല്എമാരെയും പരിഹസിച്ച് പശ്ചിമബംഗാള് മുഖ്യമന്ത്രി മമതാ ബാനര്ജിയും രംഗത്തെത്തി. അസം സര്ക്കാര് വെളളപ്പൊക്കത്തെ അഭിമുഖീകരിക്കുമ്പോള് അവരെ എന്തിനാണ് ബുദ്ധിമുട്ടിക്കുന്നത്, വിമത എംഎല്എമാരെ ബംഗാളിലേക്ക് അയക്കൂ. അവര്ക്ക് ഇവിടെ നല്ല സ്വീകരണം നല്കാം എന്നായിരുന്നു മമതയുടെ പരിഹാസം. രാഷ്ട്രപതി തെരഞ്ഞെടുപ്പ് അടുത്ത പശ്ചാത്തലത്തില് മഹാരാഷ്ട്ര സര്ക്കാരിനെ പ്രതിസന്ധിയിലാക്കാന് ബിജെപി മനപ്പൂര്വ്വം ശ്രമിക്കുകയാണെന്നും മഹാ വികാസ് അഘാഡി സര്ക്കാരിനെ താഴെയിറക്കാനുളള ബിജെപിയുടെ ശ്രമം അധാര്മ്മികവും ഭരണഘടനാ വിരുദ്ധവുമാണെന്നും അവര് കൂട്ടിച്ചേര്ത്തു.
