കൊല്ലം: തനിക്കെതിരായ എ എം എം എയുടെ നടപടികള്‍ക്കുപിന്നില്‍ ഭാരവാഹികള്‍ക്ക് തന്റെ അച്ഛനോടുളള ദേഷ്യമാണെന്ന് നടന്‍ ഷമ്മി തിലകന്‍. 'താരസംഘനടയായ എ എം എം എയുടെ ചില ഭാരവാഹികള്‍ക്ക് അച്ഛനോടുളള കലിപ്പാണ് എനിക്കെതിരായ നടപടികള്‍ക്കുപിന്നില്‍. നടന്‍ മമ്മൂട്ടി അടക്കമുളളവര്‍ എനിക്കെതിരെ അച്ചടക്ക നടപടിയെടുക്കരുതെന്ന് ആവശ്യപ്പെട്ടിരുന്നു'-ഷമ്മി തിലകന്‍ പറഞ്ഞു. എ എം എം എയില്‍നിന്ന് പുറത്താക്കിയെന്ന വാര്‍ത്ത വന്നതിനുപിന്നാലെ കൊല്ലത്ത് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
സിനിമയില്‍ വിലക്ക് നേരിട്ടിരുന്ന കാലത്ത് സംവിധായകന്‍ വിനയനുമായി സഹകരിച്ചതിനും എ എം എം എക്കെതിരെ സംസാരിച്ചതിനുമാണ് നടന്‍ തിലകനെ സംഘടന വിലക്കിയത്. 2010-ലാണ് തിലകനെ എ എം എം എയില്‍നിന്ന് പുറത്താക്കിയത്. താരസംഘടനയുടെ പ്രവര്‍ത്തനങ്ങളില്‍ സുതാര്യതയില്ലെന്ന് തിലകന്‍ വിമര്‍ശിച്ചിരുന്നു. മലയാള സിനിമയിലെ താരങ്ങളുടെ മേല്‍ക്കോയ്മയെ നിരന്തരം ചോദ്യംചെയ്തയാളാണ് തിലകന്‍. തിലകനോട് എ എം എം എ കാണിച്ച അനീതിയില്‍ പ്രതിഷേധിച്ച് ഷമ്മി തിലകന്‍ 2009 മുതല്‍ സംഘടനയില്‍നിന്ന് വിട്ടുനില്‍ക്കുകയായിരുന്നു. മോഹന്‍ലാല്‍ എ എം എം എ പ്രസിഡന്റായതിനുശേഷമാണ് ഷമ്മി വീണ്ടും സംഘടനയില്‍ സജീവമായത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക\
അതേസമയം, ഷമ്മി തിലകനെ എ എം എം എയില്‍നിന്ന് പുറത്താക്കിയെന്ന വാര്‍ത്ത തളളി സംഘടനയുടെ ഭാരവാഹികള്‍ രംഗത്തെത്തി. ഷമ്മി തിലകന്‍ ഇപ്പോഴും എ എം എം എയുടെ ഭാഗമാണെന്നും ഷമ്മിയുടെ ഭാഗംകൂടി കേട്ടതിനുശേഷമേ നടപടിയെടുക്കുകയുളളു എന്നും സംഘടനയെ പ്രതിനിതീകരിച്ച് നടന്‍ സിദ്ദിഖ് പറഞ്ഞു. കഴിഞ്ഞ ജനറല്‍ ബോഡി യോഗം ഫോണില്‍ ചിത്രീകരിച്ചത്തിന്റെ പേരില്‍ നടന്‍ ഷമ്മി തിലകനെ സംഘടനയില്‍നിന്ന് പുറത്താക്കി എന്ന തരത്തില്‍ കഴിഞ്ഞ ദിവസം വാര്‍ത്തകള്‍ വന്നിരുന്നു.
