കൊച്ചി: യുവനടിയെ ബലാത്സംഗം ചെയ്ത കേസില് നടനും നിര്മ്മാതാവുമായ വിജയ് ബാബു അറസ്റ്റില്. എറണാകുളം സൗത്ത് പൊലീസാണ് വിജയ് ബാബുവിന്റെ അറസ്റ്റ് രേഖപ്പെടുത്തിയത്. ആലുവ പൊലീസ് ക്ലബില് ചോദ്യംചെയ്യലിന് ഹാജരായപ്പോഴായിരുന്നു അറസ്റ്റ്. ഹൈക്കോടതി മുന്കൂര് ജാമ്യം അനുവദിച്ച പശ്ചാത്തലത്തില് ഇയാളെ സ്റ്റേഷന് ജാമ്യത്തില് വിട്ടേക്കും. ആവശ്യമെങ്കില് വിജയ് ബാബുവിനെ അറസ്റ്റ് ചെയ്യാനും അഞ്ച് ലക്ഷം രൂപയുടെയും രണ്ട് ആള്ജാമ്യത്തിന്റെയും പിന്ബലത്തില് വിട്ടയക്കാനും കോടതി അനുമതി നല്കിയിരുന്നു. ഇതോടെയാണ് പൊലീസ് ഇയാളെ അറസ്റ്റ് ചെയ്തത്.
ഇന്നുമുതല് ഏഴ് ദിവസം ചോദ്യംചെയ്യലുമായി സഹകരിക്കാന് വിജയ് ബാബുവിനോട് ആവശ്യപ്പെട്ടിട്ടുണ്ട്. ജൂലൈ മൂന്നാം തിയതി വരെ രാവിലെ ഒമ്പത് മണിമുതല് വൈകുന്നേരം ആറുമണിവരെ വിജയ് ബാബുവിനെ കസ്റ്റഡിയില്വെച്ച് ചോദ്യംചെയ്യാന് കോടതി അനുമതിയുണ്ട്. നടി പരാതിയില് പറയുന്ന ഹോട്ടല്മുറി ഉള്പ്പെടെയുളള സ്ഥലങ്ങളില് ഇന്ന് പൊലീസ് വിജയ് ബാബുവിനെ എത്തിച്ച് തെളിവെടുപ്പ് നടത്തും. വിജയ് ബാബുവിനെ വൈദ്യപരിശോധനയ്ക്ക് കൊണ്ടുപോകും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഏപ്രില് 22-നാണ് സിനിമയില് കൂടുതല് അവസരങ്ങള് നല്കാമെന്ന് പറഞ്ഞ് പ്രലോഭിപ്പിച്ച് വിജയ് ബാബു പീഡിപ്പിച്ചു എന്നാരോപിച്ച് യുവനടി പരാതിയുമായി പൊലീസിനെ സമീപിച്ചത്. ബലാത്സംഗം, ഗുരുതരമായി പരിക്കേല്പ്പിക്കല്, ഭീഷണിപ്പെടുത്തല് തുടങ്ങിയ വകുപ്പുകള് ചുമത്തിയാണ് വിജയ് ബാബുവിനെതിരെ പൊലീസ് കേസെടുത്തത്. യുവനടി പരാതി നല്കിയതിനുപിന്നാലെ രാജ്യംവിട്ട വിജയ് ബാബുവിനെതിരെ പൊലീസ് ലുക്ക് ഔട്ട് നോട്ടീസ് പുറത്തിറക്കുകയും ഇയാളുടെ പാസ്പോര്ട്ട് റദ്ദാക്കുകയും ചെയ്തിരുന്നു. ഹൈക്കോടതി ഇടപെടലിലാണ് വിജയ് ബാബു നാട്ടില് തിരിച്ചെത്തി മുന്കൂര് ജാമ്യം നേടിയത്.