ഡല്ഹി: മാധ്യമപ്രവര്ത്തകനും ഫാക്ട് ചെക്കിംഗ് വെബ്സൈറ്റായ ആള്ട്ട് ന്യൂസിന്റെ സഹസ്ഥാപകനുമായ മുഹമ്മദ് സുബൈറിന്റെ അറസ്റ്റില് പ്രതികരണവുമായി ഇന്ത്യന് നാഷണല് കോണ്ഗ്രസ് നേതാവ് രാഹുല്ഗാന്ധി. ബിജെപിയുടെ വിദ്വേഷവും മതഭ്രാന്തും നുണകളും തുറന്നുകാട്ടുന്ന ഓരോ വ്യക്തിയും അവര്ക്ക് ഭീഷണിയാണെന്ന് രാഹുല് ഗാന്ധി പറഞ്ഞു. സത്യത്തിന്റെ ഒരു ശബ്ദത്തെ അറസ്റ്റ് ചെയ്താല് ആയിരം ശബ്ദങ്ങള് ഉയരുകയേയുളളു എന്നും സ്വേഛാധിപത്യത്തിന്മേല് സത്യം വിജയിക്കുകതന്നെ ചെയ്യുമെന്നും രാഹുല് ഗാന്ധി പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
മതവികാരം വ്രണപ്പെടുത്തി, വിദ്വേഷം പ്രോത്സാഹിപ്പിച്ചു, കലാപത്തിന് ആഹ്വാനം ചെയ്തു തുടങ്ങിയ കുറ്റങ്ങള് ചുമത്തി ഡല്ഹി പൊലീസ് ഇന്നലെ വൈകുന്നേരം ആറരയോടെയാണ് മുഹമ്മദ് സുബൈറിനെ അറസ്റ്റ് ചെയ്തത്. 2018-ലെ ഒരു ട്വീറ്റിന്റെ പേരിലാണ് സുബൈറിനെതിരായ നടപടി. ഒരു പ്രത്യേക മതത്തിന്റെ ദൈവത്തെ അപമാനിക്കുന്ന തരത്തിലുളള ചിത്രം ബോധപൂര്വ്വം പോസ്റ്റ് ചെയ്തു എന്നാണ് സുബൈറിനെതിരായ കേസ് എന്ന് പൊലീസ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2020-ല് രജിസ്റ്റര് ചെയ്ത ഒരു കേസുമായി ബന്ധപ്പെട്ട ചോദ്യംചെയ്യലിനാണ് സുബൈറിനെ ഡല്ഹി പൊലീസ് വിളിപ്പിച്ചതെന്ന് ആള്ട്ട് ന്യൂസ് സഹസ്ഥാപകന് പ്രതീക് സിന്ഹ പറഞ്ഞു. ആ കേസില് സുബൈറിനെ അറസ്റ്റ് ചെയ്യരുതെന്ന് കോടതിയുടെ നിര്ദേശമുണ്ടായിരുന്നു. ആവര്ത്തിച്ച് ആവശ്യപ്പെട്ടിട്ടും പൊലീസ് എഫ് ഐ ആറിന്റെ പകര്പ്പ് തരാന് തയാറായില്ലെന്നും പ്രതീക് സിന്ഹ ആരോപിച്ചു. എന്നാല് മതിയായ തെളിവുകളുടെ അടിസ്ഥാനത്തിലാണ് സുബൈറിനെ അറസ്റ്റ് ചെയ്തതെന്നാണ് ഡല്ഹി പൊലീസ് അവകാശപ്പെടുന്നത്. ഇന്ത്യന് നാഷണല് കോണ്ഗ്രസ്, തൃണമൂല് കോണ്ഗ്രസ്, സി പി ഐ എം, സമാജ് വാദി പാര്ട്ടി തുടങ്ങിയ പ്രതിപക്ഷ പാര്ട്ടികള് സുബൈറിന്റെ അറസ്റ്റിനെതിരെ രംഗത്തെത്തിയിട്ടുണ്ട്.