ആലപ്പുഴ: എ കെ ജി സെന്ററില് നടന്ന ബോംബേറില് പ്രതിഷേധിച്ച് അമ്പലപ്പുഴയില് നടത്തിയ പ്രകടനത്തില് വിദ്വേഷ പരാമര്ശം. 'ഇരുളിന് മറയെ കൂട്ടുപിടിച്ച് പ്രസ്ഥാനത്തിനുനേരേ വന്നാല് അക്കൈ വെട്ടും, അക്കാല് വെട്ടും, അത്തല വെട്ടി ചെങ്കൊടി നാട്ടും' എന്നായിരുന്നു സിപിഎം പ്രവര്ത്തകര് പ്രകടനത്തിനിടെ വിളിച്ച മുദ്രാവാക്യം. എച്ച് സലാം എം എല് എയുടെ നേതൃത്വത്തിലായിരുന്നു പ്രകടനം നടന്നത്. പ്രകടനത്തിന്റെ വീഡിയോ എം എല് എ തന്റെ ഫേസ്ബുക്ക് പേജില് ലൈവായി പോസ്റ്റ് ചെയ്തിട്ടുണ്ട്.
എ കെ ജി സെന്ററിലെ ആക്രമണത്തില് പ്രതിഷേധിച്ചുളള പ്രകടനങ്ങള് അതിരുവിടരുതെന്ന് സിപിഎം സെക്രട്ടറിയേറ്റ് നിര്ദേശിച്ചിരുന്നു. പ്രകോപനങ്ങള്ക്ക് വശംവദരാകാതെ നാട്ടിലെ സമാധാനം സംരക്ഷിക്കാന് ഇടതുപക്ഷവും എല്ഡിഎഫ് പ്രവര്ത്തകരും ശ്രദ്ധിക്കണമെന്ന് മുഖ്യമന്ത്രി പിണറായി വിജയനും അഭ്യര്ത്ഥിച്ചിരുന്നു. വൈകാരികതയെ കുത്തിനോവിക്കാനുളള ശ്രമമാണ് ഉണ്ടായിരിക്കുന്നതെന്നും കുറ്റവാളികളെ കണ്ടെത്തി നിയമത്തിനുമുന്നില് കൊണ്ടുവരാന് പൊലീസിന് കര്ശന നിര്ദേശം നല്കിയിട്ടുണ്ടെന്നും അദ്ദേഹം പറഞ്ഞിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഇന്നലെ രാത്രി പതിനൊന്നരയോടെയാണ് എ കെ ജി സെന്ററിനുനേരേ ബോംബേറുണ്ടായത്. പ്രധാന കവാടത്തില് പൊലീസ് കാവല്നില്ക്കെ തൊട്ടടുത്ത കവാടത്തിനുനേരെയാണ് ബോംബേറുണ്ടായത്. സ്കൂട്ടറിലെത്തിയ അക്രമി സ്ഫോടനവസ്തു എ കെ ജി സെന്ററിന്റെ ഭിത്തിയിലേക്ക് എറിയുകയായിരുന്നു. സംഭവത്തിന്റെ സി സി ടി വി ദൃശ്യങ്ങള് പുറത്തുവന്നിരുന്നു.
