തൃശൂര്: കുട്ടികള്ക്കുനേരേ നഗ്നതാ പ്രദര്ശനം നടത്തിയ കേസില് നടന് ശ്രീജിത്ത് രവി അറസ്റ്റില്. ഇന്ന് രാവിലെ തൃശൂര് വെസ്റ്റ് പൊലീസാണ് ഇയാളെ അറസ്റ്റ് ചെയ്തത്. പോക്സോ വകുപ്പുകള് ചുമത്തിയാണ് കേസെടുത്തിരിക്കുന്നത്. രണ്ടുദിവസം മുന്പാണ് കേസിനാസ്പദമായ സംഭവം നടക്കുന്നത്. തൃശൂര് അയ്യന്തോള് എസ് എന് പാര്ക്കിനുസമീപം കാര് നിര്ത്തിയ ശ്രീജിത്ത് പതിനൊന്നും അഞ്ചും വയസുളള കുട്ടികള്ക്കുമുന്നില് നഗ്നതാ പ്രദര്ശനം നടത്തി അവിടെനിന്ന് പോവുകയായിരുന്നു. കുട്ടികള് വിവരം മാതാപിതാക്കളെ അറിയിക്കുകയും തുടര്ന്ന് പൊലീസില് പരാതി നല്കുകയുമായിരുന്നു. പ്രതിക്കായി അന്വേഷണം ആരംഭിച്ചെങ്കിലും തെളിവുകള് ലഭിച്ചിരുന്നില്ല. എന്നാല് സി സി ടി വി ദൃശ്യങ്ങള് പരിശോധിച്ചതോടെ ശ്രീജിത്ത് രവിയുടെ വാഹനം പൊലീസ് തിരിച്ചറിയുകയായിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ശ്രീജിത്ത് രവി കുറ്റം സമ്മതിച്ചതായാണ് വിവരം. തനിക്ക് ഒരു രോഗമുണ്ടെന്നും അതിന്റെ മരുന്ന് കഴിക്കാത്തതുകൊണ്ടാണ് പ്രശ്നമുണ്ടായതെന്നും ശ്രീജിത്ത് പൊലീസിനോട് പറഞ്ഞു. കുട്ടികളും പ്രതിയെ തിരിച്ചറിഞ്ഞു. ഇതിനുമുന്പും വിദ്യാര്ത്ഥികളോട് മോശമായി പെരുമാറിയതിന്റെ പേരില് ശ്രീജിത്ത് രവി അറസ്റ്റിലായിട്ടുണ്ട്. 2016-ലായിരുന്നു സംഭവം. സ്കൂളിലേക്ക് പോവുകയായിരുന്ന പെണ്കുട്ടികള്ക്കുമുന്നില് നഗ്നതാ പ്രദര്ശനം നടത്തുകയും കുട്ടികളെ ഉള്പ്പെടുത്തി സെല്ഫി എടുക്കാന് ശ്രമിക്കുകയും ചെയ്തു എന്നായിരുന്നു പരാതി. പാലക്കാട് ഒറ്റപ്പാലം പൊലീസാണ് അന്ന് ഇയാള്ക്കെതിരെ കേസെടുത്തത്. തന്നെ തെറ്റിദ്ധരിക്കുകയും കാര്യങ്ങള് വളച്ചൊടിക്കുകയുമായിരുന്നു എന്നാണ് അന്ന് ശ്രീജിത്ത് രവി നല്കിയ വിശദീകരണം.
