ബുവനേശ്വര്‍: അമ്പത്തിയെട്ടാം വയസില്‍ പത്താംക്ലാസ് പരീക്ഷ പാസായി എം എല്‍ എ. ഒഡീഷയിലെ ഫുല്‍ബാനി നിയമസഭാ മണ്ഡലത്തില്‍നിന്നുളള എം എല്‍ എ അംഗദ് കന്‍ഹാറാണ് പത്താംക്ലാസ് പരീക്ഷ 72 ശതമാനം മാര്‍ക്കോടെ വിജയിച്ചത്. 500-ല്‍ 364 മാര്‍ക്കാണ് അംഗദ് കന്‍ഹാര്‍ എം എല്‍ എ നേടിയത്. കാണ്ഡമാല്‍ ജില്ലയിലെ പിതാബരി ഗ്രാമത്തിലുളള സര്‍ക്കാര്‍ ഹൈസ്‌കൂളിലെത്തിയാണ് അദ്ദേഹം പരീക്ഷയെഴുതിയത്. 2019-ലെ നിയമസഭാ തെരഞ്ഞെടുപ്പില്‍ ബിജെഡി സ്ഥാനാര്‍ത്ഥിയായി മത്സരിച്ചാണ് അംഗദ് കന്‍ഹാര്‍ ഫുല്‍ബാനിയുടെ എം എല്‍ എയായത്.
ബാല്യകാലത്ത് കുടുംബപ്രശ്‌നങ്ങളും ദാരിദ്രവും മൂലം അദ്ദേഹത്തിന് തന്റെ പഠനം പൂര്‍ത്തിയാക്കാന്‍ സാധിച്ചിരുന്നില്ല. 1978-ല്‍ അംഗദ് കന്‍ഹാര്‍ പഠനമുപേക്ഷിച്ചു. 2019-ല്‍ നിയമസഭാംഗമായതിനുപിന്നാലെയാണ് പഠിക്കാനുളള ആഗ്രഹം അദ്ദേഹം പൊടിതട്ടിയെടുത്തത്. ആ വര്‍ഷം തന്നെ അദ്ദേഹം എട്ടാം ക്ലാസ് പരീക്ഷ പാസായിരുന്നു. പിന്നീട് പഞ്ചായത്ത് അംഗങ്ങളുടെയും തന്റെ ഡ്രൈവറുടെയും നിര്‍ബന്ധപ്രകാരമാണ് പത്താംക്ലാസ് പരീക്ഷയെഴുതാന്‍ തീരുമാനിച്ചത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'1978-ല്‍ ചില കുടുംബപ്രശ്‌നങ്ങള്‍ മൂലം എനിക്ക് മെട്രിക്കുലേഷന്‍ പരീക്ഷയെഴുതാന്‍ സാധിച്ചില്ല. 1984-ല്‍ രാഷ്ട്രീയത്തില്‍ പ്രവേശിച്ച ഞാന്‍ ഇപ്പോള്‍ എം എല്‍ എയാണ്. പഠിക്കാന്‍ പ്രത്യേകിച്ച് പ്രായമൊന്നുമില്ല. ജോലി ലഭിക്കാന്‍ മാത്രമല്ല, അറിവുനേടാനും കൂടിയാണ് വിദ്യാഭ്യാസമെന്നാണ് ഞാന്‍ വിശ്വസിക്കുന്നത്. ഒരാളും ഒരിക്കലും പഠിച്ച് തീരുന്നില്ല. വിദ്യാഭ്യാസത്തിന് വിരമിക്കല്‍ പ്രായമില്ല. ഇനിയും പഠനം തുടരാനാണ് തീരുമാനം'- അംഗദ് കന്‍ഹാര്‍ എം എല്‍ എ പറഞ്ഞു.
