പാലക്കാട്: എച്ച് ആര് ഡി എസ് സെക്രട്ടറി അജി കൃഷ്ണനെ പൊലീസ് അറസ്റ്റ് ചെയ്തു. ആദിവാസികളുടെ ഭൂമി കയ്യേറി, കുടിലുകള് കത്തിച്ചു, ജാതിപ്പേര് വിളിച്ചു തുടങ്ങിയ കുറ്റങ്ങള് ചുമത്തി ഷോളയൂര് പൊലീസ് ഇന്നലെ രാത്രി എട്ടരയോടെയാണ് ഇയാളെ അറസ്റ്റ് ചെയ്തത്. ഒരുവര്ഷം മുന്പ് ഷോളയൂര് സ്വദേശി നല്കിയ പരാതിയുടെ അടിസ്ഥാനത്തിലാണ് നടപടി. അന്ന് അജി കൃഷ്ണനെതിരെ കേസെടുത്തിരുന്നെങ്കിലും തുടര്നടപടികളുണ്ടായില്ല. വിദേശത്തായിരുന്ന അജി കൃഷ്ണന് ഇന്നലെ രാവിലെയാണ് നാട്ടിലെത്തിയത്. മറ്റൊരു കേസില് പരാതി നല്കാനായി ഡി വൈ എസ് പി ഓഫീസിലെത്തി മടങ്ങുന്നതിനിടെ വിളിച്ചുവരുത്തി അറസ്റ്റ് ചെയ്യുകയായിരുന്നെന്ന് അജി കൃഷ്ണന്റെ മകന് ആരോപിച്ചു.
സ്വര്ണ്ണക്കടത്തുകേസ് പ്രതി സ്വപ്നാ സുരേഷിന് ജോലി നല്കിയതുമായി ബന്ധപ്പെട്ട് വിവാദത്തിലായ എന് ജി ഒയാണ് എച്ച് ആര് ഡി എസ്. ആദിവാസികള്ക്ക് അവകാശപ്പെട്ട ഭൂമി വ്യാജ രേഖകള് നിര്മ്മിച്ച് കൈവശപ്പെടുത്തി, എതിര്ത്തവരെ കളളക്കേസില് കുടുക്കുകയും കയ്യേറ്റം ചെയ്യുകയും ചെയ്തു. ആദിവാസികളുടെ കുടിലുകള് കത്തിച്ചു, ജാതിപ്പേര് വിളിച്ച് അധിക്ഷേപിച്ചു തുടങ്ങിയ ആരോപണങ്ങളാണ് അജി കൃഷ്ണനെതിരെ പരാതിക്കാരന് ഉന്നയിക്കുന്നത്. കോടതിയില് ഹാജരാക്കിയ ഇയാളെ റിമാന്ഡ് ചെയ്തു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, സ്വപ്നാ സുരേഷിന് ജോലി നല്കിയെന്ന ഒറ്റ കാരണത്താല് എച്ച് ആര് ഡി എസിനെ തകര്ക്കാനുളള നീക്കമാണ് നടത്തുന്നതെന്ന് അജി കൃഷ്ണന് ആരോപിച്ചു. മുഖ്യമന്ത്രി പിണറായി വിജയന്റെ ഒത്താശയോടെയാണ് എച്ച് ആര് ഡി എസിനെ ആക്രമിക്കുന്നതെന്നും ഭരണകൂട ഭീകരതയുടെ ഭാഗമായാണ് തന്നെ കളളക്കേസില് കുടുക്കി അറസ്റ്റ് ചെയ്തതെന്നും ഇയാള് പറഞ്ഞു. തനിക്കെതിരെ പരാതി നല്കിയ ആള് എത്തിയത് സിപിഎം ഏരിയാ കമ്മിറ്റിയുടെ വാഹനത്തിലായിരുന്നെന്നും അജി കൃഷ്ണന് കൂട്ടിച്ചേര്ത്തു. ആദിവാസി വിഭാഗത്തിന്റെ ക്ഷേമത്തിനായി അട്ടപ്പാടി കേന്ദ്രീകരിച്ച് പ്രവര്ത്തിക്കുന്ന എന് ജി ഒയാണ് എച്ച് ആര് ഡി എസ്.
