ഡല്ഹി: മാധ്യമങ്ങള്ക്കെതിരെ രൂക്ഷ വിമര്ശനവുമായി ചീഫ് ജസ്റ്റിസ് എന് വി രമണ. മാധ്യമങ്ങള് പലപ്പോഴും അതിരുവിട്ട് പ്രവര്ത്തിക്കുകയാണ്. പരിചയ സമ്പത്തുള്ള ജഡ്ജിമാര്ക്ക് പോലും വിധി കല്പ്പിക്കാന് ബുദ്ധിമുട്ടുന്ന വിഷയങ്ങളില് മാധ്യമങ്ങള് 'കങ്കാരൂ' കോടതികള് സംഘടിപ്പിക്കുകയാണെന്നും ചീഫ് ജസ്റ്റിസ് പറഞ്ഞു. മാധ്യമങ്ങളുടെ മേല് നിയന്ത്രണം കൊണ്ടുവരാന് പ്രേരിപ്പിക്കരുത്. ജഡ്ജിമാര്ക്ക് മേല് വരുന്ന ആരോപണങ്ങളില് അവര് പ്രതികരിക്കാത്തത് ഒരു ദൌര്ലഭ്യമായി മാധ്യമങ്ങള് കാണരുതെന്നും എന് വി രമണ അഭിപ്രായപ്പെട്ടു.
മാധ്യമ വിചാരണ ജനാധിപത്യത്തിന് ചേര്ന്നതല്ല. അജണ്ടകളോടുകൂടിയ ചര്ച്ചകള് ചിലപ്പോള് വിധിന്യായത്തെപ്പോലും സ്വാധീനിച്ചേക്കാം. മാധ്യമങ്ങളിലും, സാമൂഹിക മാധ്യമങ്ങളിലും ജഡ്ജിമാര്ക്കെതിരെ ആസൂത്രിതമായ പ്രചാരണങ്ങള് ശക്തമാകുകയാണ്. ഉത്തരവാദിത്തങ്ങളുടെ അതിര്വരമ്പുകള് ലംഘിക്കുന്നതിലൂടെ ജനാധിപത്യത്തെ രണ്ടടി മാധ്യമങ്ങള് പിന്നോട്ടടിക്കുകയാണെന്നും ചീഫ് ജസ്റ്റിസ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ജാര്ഖണ്ഡിലെ റാഞ്ചിയില് നടന്ന ജസ്റ്റിസ് എസ് ബി സിന്ഹ അനുസ്മരണ ചടങ്ങില് സംസാരിക്കവയാണ് ചീഫ് ജസ്റ്റിസ് മാധ്യമങ്ങള്ക്കെതിരെ രൂക്ഷവിമര്ശനം ഉന്നയിച്ചത്. അച്ചടി മാധ്യമങ്ങള് ഒരു പരിധിവരെ വാര്ത്തകള് നല്കുന്നതില് ശ്രദ്ധ പുലര്ത്തുന്നുണ്ട്. എന്നാല് ദൃശ്യമാധ്യമങ്ങളാണ് ജനാധിപത്യത്തോടും നീതിന്യായ വ്യവസ്ഥിതിയോടും യാതൊരുവിധത്തിലുള്ള കൂറും പുലര്ത്താതെ പ്രവര്ത്തിക്കുന്നതെന്നും എന് വി രമണ കൂട്ടിച്ചേര്ത്തു.