പാലക്കാട്: പാലക്കാട് രക്ഷിതാക്കളുടെ അനുമതിയില്ലാതെ സ്‌കൂള്‍ വിദ്യാര്‍ത്ഥികളെ എസ് എഫ് ഐയുടെ പരിപാടിക്ക് കൊണ്ടുപോയ സംഭവത്തില്‍ പരാതി നല്‍കി രക്ഷിതാക്കള്‍. വിദ്യാര്‍ത്ഥികളെ സ്‌കൂളിന്റെയോ രക്ഷിതാക്കളുടെയോ സമ്മതമില്ലാതെ പരിപാടിക്ക് കൊണ്ടുപോയവര്‍ക്കെതിരെ നടപടിയെടുക്കണമെന്നാവശ്യപ്പെട്ട് മങ്കര എസ് എച്ച് ഒയ്ക്കാണ് പരാതി നല്‍കിയിരിക്കുന്നത്. മാതാപിതാക്കളുടെ പരാതിയുടെ അടിസ്ഥാനത്തില്‍ സ്‌കൂളില്‍ ഇന്ന് അടിയന്തര പി ടി എ യോഗം ചേരും.
സ്‌കൂള്‍ വിദ്യാര്‍ത്ഥികളെ ബിരിയാണി വാങ്ങിത്തരാം എന്ന് പ്രലോഭിപ്പിച്ച് പരിപാടിക്ക് കൂട്ടിക്കൊണ്ടുപോയി എന്നാണ് രക്ഷിതാക്കള്‍ ആരോപിക്കുന്നത്. പത്തിരിപ്പാല ജിവിഎച്ച്എസ്എസിലെ വിദ്യാര്‍ത്ഥികളെയാണ് കളക്ടറേറ്റിലേക്ക് എസ് എഫ് ഐ പാലക്കാട് ജില്ലാ കമ്മിറ്റി നടത്തിയ മാര്‍ച്ചിലേക്ക് കൊണ്ടുപോയത്. എസ് എഫ് ഐ വിവിധ ആവശ്യങ്ങളുന്നയിച്ച് സര്‍ക്കാരിന് സമര്‍പ്പിച്ച അവകാശ പത്രിക അംഗീകരിക്കണമെന്നാവശ്യപ്പെട്ടായിരുന്നു മാര്‍ച്ച്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അതേസമയം, സ്‌കൂളിലെ ഇടത് അനുഭാവികളായ അധ്യാപകര്‍ കൂട്ടുനിന്നാണ് കുട്ടികളെ എസ് എഫ് ഐക്കാര്‍ കൊണ്ടുപോയതെന്നും വിദ്യാര്‍ത്ഥികള്‍ സ്‌കൂളിലെത്താത്ത വിവരം അധ്യാപകര്‍ മറച്ചുവയ്‌ച്ചെന്നും യൂത്ത് കോണ്‍ഗ്രസ് ആരോപിച്ചു. എസ് എഫ് ഐ നേതാക്കള്‍ക്കെതിരെ തട്ടിക്കൊണ്ടുപോകലിന് കേസെടുക്കണമെന്നാവശ്യപ്പെട്ട് യൂത്ത് കോണ്‍ഗ്രസ് പൊലീസില്‍ പരാതി നല്‍കിയിട്ടുണ്ട്.
