കണ്ണൂര്: തനിക്ക് യാത്രാവിലക്കേര്പ്പെടുത്തിയ ഇന്ഡിഗോയുടെ വിമാനത്തില് കയറില്ലെന്ന നിലപാടിലുറച്ച് എല് ഡി എഫ് കണ്വീനര് ഇ പി ജയരാജന്. 'വിലക്കിയത് ഞാനാണ്. എന്റെ വിലക്ക് നാളെയോടെ തീരില്ല' എന്നാണ് ഇ പി ജയരാജന് പറഞ്ഞത്. യാത്രാവിലക്കുമായി ബന്ധപ്പെട്ട മാധ്യമപ്രവര്ത്തകരുടെ ചോദ്യത്തിന് മറുപടി നല്കുകയായിരുന്നു അദ്ദേഹം. ഇന്ഡിഗോയുടെ വിലക്ക് തീരാനിരിക്കെയാണ് ഇ പി ജയരാജന്റെ പ്രതികരണം. മുഖ്യമന്ത്രിക്കെതിരെ മുദ്രാവാക്യം വിളിച്ച യൂത്ത് കോണ്ഗ്രസ് പ്രവര്ത്തകരെ കായികമായി നേരിട്ടതോടെയാണ് ഇന്ഡിഗോ കമ്പനി ഇ പി ജയരാജന് മൂന്നാഴ്ച്ചത്തെ യാത്രാവിലക്കേര്പ്പെടുത്തിയത്. വിമാനത്തില് പ്രതിഷേധിച്ച യൂത്ത് കോണ്ഗ്രസ് പ്രവര്ത്തകര്ക്കും വിലക്കേര്പ്പെടുത്തിയിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
വിമാനക്കമ്പനി യാത്രാ വിലക്കേര്പ്പെടുത്തിയതിനുപിന്നാലെയാണ് താന് ഇനി ഇന്ഡിഗോയുടെ വിമാനത്തില് കയറില്ലെന്ന് ഇ പി ജയരാജന് പ്രഖ്യാപിച്ചത്. ഇന്ഡിഗോ വൃത്തികെട്ട വിമാനക്കമ്പനിയാണെന്നും നിലവാരമില്ലാത്ത ആ വിമാനത്തില് യാത്ര ചെയ്തില്ലെങ്കില് തനിക്ക് ഒന്നും സംഭവിക്കാന് പോകുന്നില്ലെന്നുമാണ് എ പി പറഞ്ഞത്. 'വിലക്ക് മൂന്നാഴ്ച്ചയല്ലേ? ഞാനീ കമ്പനിയുടെ വിമാനത്തില് കയറില്ല ഇനി. മാന്യന്മാരായ വേറേ പല വിമാനക്കമ്പനികളുമുണ്ട്. എനിക്ക് യാത്ര ചെയ്യേണ്ടിവരുന്നുണ്ടെങ്കില് ഞാന് ഇനി ആ വിമാനങ്ങളിലേ പോകൂ. ഇന്ഡിഗോ കമ്പനിയുടെ വിമാനത്തിലിനി ഞാന് കയറില്ല. ഇങ്ങനൊരു വൃത്തികെട്ട കമ്പനി.
അവരുടെ വിമാന സര്വീസുകള് അപകടത്തിലാണെന്ന് പലസ്ഥലത്തും വാര്ത്തകള് വരുന്നുണ്ട്. അതുകൊണ്ട് ആ കമ്പനി ഞാന് ഉപേക്ഷിക്കുകയാണ്. ഇനി അതില് യാത്ര ചെയ്യില്ല. എനിക്കൊന്നും സംഭവിക്കാന് പോകുന്നില്ല അതില് യാത്ര ചെയ്തില്ലെങ്കില്. 18 ക്രിമിനല് കേസുകളിലെ പ്രതികള് പറയുന്നതുകേട്ട് വിധിക്കാനാണ് അവരുടെ തീരുമാനമെങ്കില് ആ കമ്പനി എന്റെ അഭിപ്രായത്തില് നിലവാരമില്ലാത്ത കമ്പനിയാണ്. കമ്പനി എന്നെ പ്രശംസിച്ചിട്ട് എനിക്ക് അവാര്ഡ് തരികയാണ് വേണ്ടത്. അവര്ക്ക് ചീത്തപ്പേരുണ്ടാകാതിരിക്കാനുളള സാഹചര്യം സൃഷ്ടിച്ചതിന്.'-എന്നായിരുന്നു ഇ പി ജയരാജന് പറഞ്ഞത്.
