ബംഗളുരു: മാംസാഹാരം കഴിച്ച് ക്ഷേത്രത്തില് പോയി മതവികാരം വ്രണപ്പെടുത്തിയെന്ന ബിജെപിയുടെ ആരോപണത്തില് പ്രതികരണവുമായി കര്ണാടക മുന് മുഖ്യമന്ത്രിയും മുതിര്ന്ന കോണ്ഗ്രസ് നേതാവുമായ സിദ്ധരാമയ്യ. മാംസാഹാരം കഴിക്കുന്നതൊക്കെ തന്റെ വ്യക്തിപരമായ കാര്യമാണെന്നും ബിജെപിക്കാര് ഒരു പണിയുമില്ലാത്തതിനാലാണ് ഇത്തരം വിവാദങ്ങളുണ്ടാക്കുന്നതെന്നും സിദ്ധരാമയ്യ പറഞ്ഞു.
'മാംസം കഴിക്കുന്നത് ഒരു പ്രശ്നമാണോ? എന്ത് കഴിക്കണമെന്നതൊക്കെ ഒരാളുടെ വ്യക്തിപരമായ കാര്യമാണ്. ഞാന് മാംസാഹാരവും സസ്യാഹാരവുമൊക്കെ കഴിക്കാറുണ്ട്. അത് എന്റെ ശീലമാണ്. ചിലര് മാംസാഹാരം കഴിക്കില്ല. അത് അവരുടെ ശീലമാണ്. എനിക്കിതൊന്നും വലിയ പ്രശ്നമായി തോന്നുന്നില്ല. ചിലയാളുകള് ക്ഷേത്രങ്ങളില് മാംസം കഴിക്കാതെ പോകുന്നു. ചിലര് മാംസം കഴിച്ച് പോകുന്നു. പലയിടങ്ങളിലും ദേവതകള്ക്ക് മാംസം നിവേദ്യമായി നല്കുന്നുണ്ട്. സത്യത്തില് അന്ന് ക്ഷേത്രത്തില് കയറുമ്പോള് ഞാന് മാംസം കഴിച്ചിരുന്നില്ല. ഒരു പണിയുമില്ലാത്ത ബിജെപിക്കാര് അനാവശ്യമായി വിവാദമുണ്ടാക്കുകയാണ്'-സിദ്ധരാമയ്യ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അടുത്തിടെ കുടക് സന്ദര്ശനത്തിനിടെ കൊഡ്ലിപ്പേട്ടിലുളള ബസവേശ്വര ക്ഷേത്രത്തില് സിദ്ധരാമയ്യ മാംസാഹാരം കഴിച്ച് പ്രവേശിച്ചു എന്നായിരുന്നു ബിജെപിയുടെ ആരോപണം. നേരത്തെ കര്ണാടകയില് ബീഫ് വിവാദം കത്തിക്കയറിയ സമയത്തും ഇഷ്ടമുളള ഭക്ഷണം താന് കഴിക്കുമെന്ന് വ്യക്തമാക്കി സിദ്ധരാമയ്യ രംഗത്തെത്തിയിരുന്നു. ഇതുവരെ താന് ബീഫ് കഴിച്ചിട്ടില്ല എന്നാല് കഴിക്കണമെന്ന് തോന്നിയാല് കഴിക്കും. അത് ചോദ്യംചെയ്യാന് ബിജെപിക്കാര് ആരാണ് എന്നായിരുന്നു സിദ്ധരാമയ്യയുടെ ചോദ്യം.