ആലപ്പുഴ: കേരളത്തിലെ റോഡുകള്‍ക്ക് ഗുണനിലവാരം കുറവാണെന്ന് കോണ്‍ഗ്രസ് നേതാവ് രാഹുല്‍ ഗാന്ധി. മോശം റോഡുകള്‍ കാരണം ദുരിതമനുഭവിക്കുന്നത് സാധാരണക്കാരായ ജനങ്ങളാണെന്നും തകര്‍ന്ന റോഡുകളിലൂടെയുളള യാത്ര ഗുരുതരമായ അപകടങ്ങളുണ്ടാക്കുന്നുണ്ടെന്നും രാഹുല്‍ ഗാന്ധി പറഞ്ഞു. ഭാരത് ജോഡോ യാത്രയുടെ രണ്ടാം ദിവസത്തെ സമാപന യോഗത്തില്‍ സംസാരിക്കുമ്പോഴായിരുന്നു രാഹുലിന്റെ പ്രതികരണം.
'സിപിഎമ്മിനെ വിമര്‍ശിക്കാന്‍ വേണ്ടി പറയുന്നതല്ല. യുഡിഎഫിന്റെ കാലത്തും റോഡുകള്‍ നിര്‍മ്മിച്ചിട്ടുണ്ട്. പക്ഷേ ഈ റോഡുകളുടെ ഗുണനിലവാരം വളരെ കുറവാണ്. യാത്രക്കാര്‍ അപകടത്തില്‍പ്പെടുന്നു. അവര്‍ക്ക് മതിയായ ശുശ്രൂഷ നല്‍കാന്‍ പോലും സൗകര്യങ്ങള്‍ കുറവാണ്. ആലപ്പുഴയിലൂടെ ഞാന്‍ കടന്നുവന്ന റോഡില്‍ ഓരോ അഞ്ചുമിനിറ്റിലും ആംബുലന്‍സുകള്‍ പോകുന്നുണ്ടായിരുന്നു. കുറഞ്ഞ സമയത്തിനുളളില്‍ ഇത്രയധികം ആംബുലന്‍സുകള്‍ പോകുന്നത് ആദ്യമായാണ് കാണുന്നത്'-രാഹുല്‍ ഗാന്ധി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അതേസമയം, രാഹുല്‍ ഗാന്ധി നയിക്കുന്ന ഭാരത് ജോഡോ യാത്രയുടെ ആലപ്പുഴയിലെ പര്യടനം മൂന്നാം ദിവസത്തിലേക്ക് കടന്നു. രാവിലെ ആലപ്പുഴയിലെ മത്സ്യത്തൊഴിലാളികളുമായി സംസാരിച്ച രാഹുല്‍ അവരുടെ ജോലിയെക്കുറിച്ചും അവര്‍ നേരിടുളള പ്രതിസന്ധികളെക്കുറിച്ചും ചോദിച്ചറിഞ്ഞു. ഇന്ധനവില, മത്സ്യസമ്പത്ത് കുറയുക, സാമൂഹ്യക്ഷേമ നയങ്ങളുടെ അഭാവം, വിദ്യാഭ്യാസ അവസരങ്ങള്‍ തുടങ്ങിയവയാണ് തങ്ങള്‍ നേരിടുന്ന പ്രധാന വെല്ലുവിളികളെന്ന് മത്സ്യത്തൊഴിലാളികള്‍ രാഹുലിനോട് പറഞ്ഞു.
