മലപ്പുറം: സിപിഐ മലപ്പുറം ജില്ലാ സമ്മേളനത്തില് എല് ഡി എഫ് സ്വതന്ത്ര എം എല് എമാര്ക്കെതിരെ ഉയര്ന്ന വിമര്ശനത്തില് മറുപടിയുമായി കെ ടി ജലീല്. എല്ലാവർക്കും കൊട്ടാനുള്ള ചെണ്ടയല്ല സ്വതന്ത്ര എം.എൽ.എമാർ. മാധ്യമങ്ങളും വലതുപക്ഷവും നിശ്ചയിക്കുന്ന അജണ്ടകൾക്ക് ചൂട്ടു പിടിക്കുന്നവർ ആത്യന്തികമായി ദുർബലമാക്കുന്നത് ഏതുചേരിയെയാണെന്ന് ഗൗരവപൂർവ്വം ആലോചിച്ചാൽ നന്നാകും. യഥാർത്ഥ മതനിരപേക്ഷ മനസ്സുകൾ ആന കുത്തിയാലും നിൽക്കുന്നേടത്ത് നിന്ന് ഒരിഞ്ചും അകലില്ല. അകലുന്നുണ്ടെങ്കിൽ 'അസുഖം' വേറെയാണ്. അതിനുള്ള ചികിൽസ വേറെത്തന്നെ നൽകണമെന്നാണ് കെ ടി ജലീല് ഫേസ്ബുക്കില് കുറിച്ചത്. നിലമ്പൂര് എം എല് എ പി വി അന്വറിനോടൊപ്പമുള്ള ചിത്രവും അദ്ദേഹം പങ്കുവെച്ചിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
മതനിരപേക്ഷ മനസുകളെ കെ ടി ജലീലും പി വി ആന്വറും ഇടതുപക്ഷ ചേരിയില് നിന്നും അകറ്റിയെന്നായിരുന്നു സിപിഐയുടെ ജില്ലാ സമ്മേളനത്തില് ഉയര്ന്ന വിമര്ശനം. മത സാമുദായിക ശക്തികളോട് സര്ക്കാര് അനാവശ്യ മമത കാണിക്കുന്നുവെന്നും ജില്ലാ സെക്രട്ടറി പി കെ കൃഷ്ണദാസ് അവതരിപ്പിച്ച പ്രവര്ത്തന റിപ്പോര്ട്ടില് ആരോപിച്ചിരുന്നു. കൂടാതെ, ഇടതുപക്ഷത്തിന്റെ പാരിസ്ഥിതിക നിലപാടുകള്ക്ക് എതിരെ പ്രവര്ത്തിക്കുന്ന പി വി അന്വര് എംഎല്എയുടെ നടപടികള് തിരുത്താനുള്ള നടപടികള് സ്വീകരിക്കണമെന്നും റിപ്പോര്ട്ടില് പറഞ്ഞിരുന്നു. ഇതിനെതിരെയാണ് കെ ടി ജലീല് എം എല് എയുടെ വിമര്ശനം.
