സംസ്ഥാനത്ത് കൊവിഡ്-19 രോഗം മാറി നിരീക്ഷണത്തിലായിരുന്ന ആൾ മരിച്ചു. മലപ്പുറം കീഴാറ്റൂർ സ്വദേശി വീരാൻ കുട്ടിയാണ് മരിച്ചത്. 85 വയസ്സായിരുന്നു. മഞ്ചേരി മെഡിക്കൽ കോളേജ് ആശുപത്രിയിൽ ശനിയാഴ്ച പുലർച്ചെയായിരുന്നു മരണം. ഹൃദയാഘാതമാണ് മരണകാരണമെന്ന് മെഡിക്കൽ കോളേജിലെ ഡോക്ടർമാർ അറിയിച്ചു. വൃക്കരോഗത്തിനും ചികിത്സയിലായിരുന്നു. കൊവിഡിന് ചികിത്സയിലായിരിക്കെ ഇദ്ദേഹത്തെ നിരവധിതവണ ഡയാലിസിസിന് വിധേയനാക്കിയിരുന്നു.
ഉംറ കഴിഞ്ഞെത്തിയ മകനിൽ നിന്നാണ് വീരാൻ കുട്ടിക്ക് കൊവിഡ് പകർന്നതെന്നാണ് നിഗമനം. അതേ സമയം മകന് രോഗലക്ഷണം ഉണ്ടായിരുന്നില്ല. ഇയാളുടെ അവസാനത്തെ രണ്ട് പരിശോധനാ ഫലങ്ങളും നെഗറ്റീവായിരുന്നു. മൂന്ന് ദിവസം മുമ്പാണ് പരിശോധനാ ഫലം വന്നത്. ഇതിനാൽ ഇയാൾക്ക് രോഗം ഭേദമായി എന്ന നിഗമനത്തിലായിരുന്നു ഡോക്ടർമാർ. ഇയാളുടെ സ്രവം ഒരിക്കൽ കൂടി പരിശോധിക്കും. ഇതിന് ശേഷമാണ് മൃതദേഹം സംസ്കരിക്കുന്ന പ്രോട്ടോക്കോൾ തയ്യാറാക്കുക.
