രാജ്യത്ത് കോവിഡ് മരണങ്ങൾ 934 ആയെന്ന് കേന്ദ്ര ആരോഗ്യ മന്ത്രാലയം. കഴിഞ്ഞ 24 മണിക്കൂറിൽ 62 മരണങ്ങളാണ് റിപ്പോര്ട്ട് ചെയ്യപ്പെട്ടത്. 1,543 പേർക്ക് പുതുതായി രോഗം സ്ഥിരീകരിക്കുകയും ചെയ്തു. ഒരു ദിവസം രാജ്യത്ത് റിപ്പോർട്ട് ചെയ്യുന്ന ഏറ്റവും ഉയർന്ന കോവിഡ് മരണനിരക്കാണിത്. 6,868 പേർ രോഗമുക്തരായി.
മഹാരാഷ്ട്രയിൽ കോവിഡ് ബാധിച്ച് 369 പേരാണ് മരിച്ചത്. ഇതുവരെ 8,590 പേർക്കാണ് രോഗം ബാധിച്ചത്. ഗുജറാത്തിൽ 3,548 പേർക്ക് രോഗം സ്ഥിരീകരിച്ചു. മരണസംഖ്യ 162 ആയി. ഡൽഹിയിൽ രോഗബാധിതരുടെ എണ്ണം 3,108 ആയി. 54 പേരുടെ ജീവൻ നഷ്ടമായി. മധ്യപ്രദേശിൽ 110 പേരാണ് മരിച്ചത്. 2,168 പേർ കോവിഡ് ബാധിതരാണ്.
ആന്ധ്രാപ്രദേശിലും തെലങ്കാനയിലും ആയിരത്തിലേറെ പേർക്ക് രോഗം പിടിപെട്ടു. കേരളത്തിൽ 481 പേർക്കാണ് കോവിഡ് സ്ഥിരീകരിച്ചത്. ഇതിൽ 123 പേർ മാത്രമാണ് ചികിത്സയിൽ തുടരുകയാണ്. ഇടുക്കി ജില്ലയിൽ 3 പേർക്ക് കൂടി കോവിഡ് സ്ഥിരീകരിച്ചു. ഇന്നലെ രാത്രി വൈകി വന്ന പരിശോധനാ ഫലങ്ങളാണ് പോസിറ്റീവ് ആയത്.
