കേരളത്തിൽ മൂന്നാമത് ഒരാൾക്കുക്കൂടി കൊറോണ വൈറസ്. ചൈനയിലെ വുഹാനിൽ നിന്ന് എത്തിയ വിദ്യാർത്ഥിക്കാണ് രോഗം സ്ഥിരീകരിച്ചത്. കാസർഗോഡ്, കാഞ്ഞങ്ങാട് ജില്ലാ ആശുപത്രിയിൽ ചികിത്സയിലാണ് ഈ വിദ്യാര്‍ത്ഥി. ഇവിടെ മറ്റൊരാള്‍ക്കൂടി ഐസൊലേഷൻ വാർഡിൽ നിരീക്ഷണത്തിലുണ്ടെന്ന് ആരോഗ്യമന്ത്രി കെ.കെ. ഷൈലജ നിയമസഭയെ അറിയിച്ചു. കൊറോണ വൈറസ് ബാധയെ കുറിച്ചുള്ള ആശങ്ക സംബന്ധിച്ച് പ്രതിപക്ഷ നേതാവ് രമേശ് ചെന്നിത്തലയുടെ സബ്മിഷനില്‍, നിയമസഭാ ചട്ടം 300 അനുസരിച്ച് പ്രത്യേക പ്രസ്താവന നടത്തുകയായിരുന്നു മന്ത്രി. നേരത്തെ കൊറോണ വൈറസ് ബാധ സ്ഥിരീകരിച്ച 2 പേരുടെ നില തൃപ്തികരമാണെന്നും മന്ത്രി അറിയിച്ചു.
കഴിഞ്ഞ ദിവസമാണ് കേരളത്തിൽ രണ്ടാമത്തെ കൊറോണ വൈറസ് ബാധ സ്ഥിരീകരിച്ചത്. ചൈനയിൽ നിന്നെത്തിയ ആലപ്പുഴയില്‍ ചികിത്സയില്‍ കഴിയുന്ന വിദ്യാര്‍ത്ഥിയിലാണ് വൈറസിന്‍റെ സാന്നിദ്ധ്യം കണ്ടെത്തിയത്. വിദ്യാര്‍ത്ഥി ആശുപത്രിയിൽ ചികിത്സയിലാണെന്നും, നില ഗുരുതരമല്ലെന്നും കേന്ദ്ര ആരോഗ്യ മന്ത്രാലയം വാർത്താക്കുറിപ്പിലൂടെ അറിയിച്ചിരുന്നു. ജനുവരി 24-ന് ചൈനയിൽ നിന്നു തിരിച്ചെത്തിയ വുഹാൻ സർവകലാശാലയിലെ വിദ്യാർഥികളിലാണ് വൈറസിന്‍റെ സാന്നിദ്ധ്യം കണ്ടെത്തിയത്. കൃത്യമായ പരിശോധനയും നിരീക്ഷണവും നടത്തുന്നുണ്ടെന്നും മൂന്നു പേരുടേയും സ്ഥിതി തൃപ്തികരമാണെന്നും ആരോഗ്യമന്ത്രി വ്യക്തമാക്കി.
