മധ്യപ്രദേശിലെ നരസിങ്പുരിൽ അതിഥി തൊഴിലാളികൾ സഞ്ചരിച്ചിരുന്ന ട്രക്ക് അപകടത്തിൽപെട്ട് അഞ്ചുപേർ മരിച്ചു. 15 പേർക്ക് പരിക്കേറ്റു. ഇവരെ ആശുപത്രിയിൽ പ്രവേശിപ്പിച്ചു. പരിക്കേറ്റ രണ്ട് പേരുടെ നില അതീവ ഗുരുതരമാണെന്നാണ് അറിയുന്നത്. ഭോപാലിൽനിന്ന് 200 കിലോമീറ്റർ അകലെ ഇന്നലെ രാത്രിയാണു സംഭവം. ഹൈദരാബാദിൽ നിന്നും മധ്യപ്രദേശിലെ ഝാൻസിയിലേക്കും ഉത്തർപ്രദേശിലേക്കും പോയ 20 തൊഴിലാളികളാണ് അപകടത്തില് പെട്ടത്.
നിയന്ത്രണം നഷ്ടപ്പെട്ട ട്രക്ക് തലകീഴായി മറിയുകയായിരുന്നു. മഹാരാഷ്ട്രയിൽ പാളത്തിൽ ഉറങ്ങിയ തൊഴിലാളികളുടെ മേൽ ചരക്കുതീവണ്ടി പാഞ്ഞുകയറി 16 പേർ മരണപ്പെട്ട വാര്ത്തയുടെ ആഘാതത്തില്നിന്നും രാജ്യം വിട്ടുമാറുന്നതിനു മുന്പാണ് മറ്റൊരു അപകട വാര്ത്തകൂടെ പുറത്തുവരുന്നത്. രാജ്യവ്യാപകമായി ലോക്ക് ഡൌണ് പ്രഖ്യാപിച്ചതോടെ രാജ്യത്തെ വിവിധ സംസ്ഥാനങ്ങളിലേക്ക് ജോലിക്കായി കുടിയേറിയ ആയിരക്കണക്കിന് തൊഴിലാളികളാണ് തിരിച്ചു നാടുകളിലേക്ക് പലവിധത്തില് മടങ്ങാന് ശ്രമിക്കുന്നത്.
