ഡൽഹിയിൽ ആരോഗ്യമന്ത്രാലയത്തിലെ ഉദ്യോഗസ്ഥന് കൊവിഡ്. ആരോഗ്യമന്ത്രാലയത്തിന് കീഴിലെ മെഡിക്കൽ വിദ്യാഭ്യാസ വിഭാഗത്തിലെ ജീവനക്കാരനാണ് കൊവിഡ് സ്ഥിരീകരിച്ചത്. കൊവിഡ് പ്രോട്ടോക്കോൾ പ്രകാരം ഓഫീസ് ഒഴിപ്പിച്ച് അണുവിമുക്തമാക്കാനുള്ള നടപടികൾ ആരംഭിച്ചു. രോഗിയുടെ സർക്കപ്പെട്ടിക തയ്യാറാക്കുകയാണെന്ന് ആരോഗ്യമന്ത്രാലയം അറിയിച്ചു. ആരോഗ്യമന്ത്രാലയത്തിലെ ജീവനക്കാരന് കൊവിഡ് ബാധിച്ചത് ഏറെ ആശങ്ക സൃഷ്ടിച്ചിട്ടുണ്ട്. ആദ്യമായാണ് ആരോഗ്യമന്ത്രാലയത്തിൽ ജീവനക്കാരന് രോഗം സ്ഥിരീകരിക്കുന്നത്. ഡൽഹിയിൽ ഇതിനകം 500 ഓളം ആരോഗ്യ പ്രവർത്തകർക്കാണ് രോഗം സ്ഥിരീകരിച്ചിട്ടുളളത്.
ഡൽഹിയിൽ ഇന്ന് മാത്രം 534 പേർക്ക് കൊവിഡ് സ്ഥിരീകരിച്ചു. ആകെ രോഗബാധിതരുടെ എണ്ണം 11088 ആയി 442 പേർ രോഗമുക്തി നേടി ആശുപത്രിവിട്ടു. പത്തുപേർ രോഗം ബാധിച്ച് മരിച്ചു. ഇതോടെ ഡൽഹിയിലെ മരണസംഖ്യ 176 ആയി. 5720 പേരാണ് ചികിത്സയിലുള്ളത്. 5192 പേരാണ് രോഗമുക്തി നേടിയത്. സെൻട്രൽ ഡൽഹിയിലാണ് ഏറ്റവും കൂടതൽ കൊവിഡ് രോഗികളുള്ളത്. സൗത്ത് ഈസ്റ്റ് ഡൽഹിയിലും വെസ്റ്റ് ഡൽഹിയിലും സ്ഥിതിഗതികൾ ഗുരുതരമായി തുടരുകയാണ്. നോർത്ത് ഈസ്റ്റ് ഡൽഹിയിലാമ് ഏറ്റവും കുറവ് രോഗികൾ ഉള്ളത്.
