കേരളത്തിലെ ഡാമുകളിലെ ജലനിരപ്പുമായി ബന്ധപ്പെട്ട് ഹൈക്കോടതി സ്വമേധയാ കേസെടുത്തു. ജസ്റ്റിസ് ദേവൻ രാമചന്ദ്രൻ ചീഫ് ജസ്റ്റിസിനയച്ച കത്ത് പരിസണിച്ചാണ് ഹൈക്കോടതി സ്വമേധയാ കേസെടുത്തത്. അണക്കെട്ടുകളിലെ ജലനിരപ്പ് ആശങ്ക സൃഷ്ടിക്കുന്നതാണെന്ന് ചൂണ്ടിക്കാട്ടിയാണ് ദേവൻ രാമചന്ദ്രൻ ചീഫ് ജസ്റ്റിസിന് കത്തയച്ചത്.
വേനൽ മഴയിൽ ഡാം നിറഞ്ഞിട്ടുണ്ടെന്നും, കാലവർഷം എത്തുന്നതോടെ സ്ഥിതി നിയന്ത്രണാതീതമാകുമെന്നും കത്തിൽ ചൂണ്ടിക്കാട്ടിയിട്ടുണ്ട്. കാലവർഷം കനക്കുമെന്ന കാലാവസ്ഥാ നിരീക്ഷണ കേന്ദ്രം പ്രവചിക്കുന്ന സാഹചര്യത്തിൽ ഡാമിലെ വെള്ളം മുൻകൂട്ടി ക്രമീകരിക്കേണ്ടതുണ്ടെന്ന് കത്തിൽ വ്യക്തമകാക്കുന്നു. പ്രളയത്തിന്റെ മുൻകാല അനുഭവങ്ങൾ പാഠമാക്കി തയ്യാറെടുപ്പ് നടത്തണമെന്നും ജസ്റ്റിസ് ദേവൻ രാമചന്ദ്രൻ ആവശ്യപ്പെട്ടിട്ടുണ്ട്. ഇക്കാര്യങ്ങളിൽ കോടതിയുടെ ഇടപെടൻ ആവശ്യമാണെന്ന് കത്തിൽ ചൂണ്ടിക്കാട്ടിയിട്ടുണ്ട്. വിഷയത്തിന്റെ ഗൗരവം പരിഗണിച്ചാണ് കേസെടുക്കാൻ ചീഫ് ജസ്റ്റിസ് ഉത്തരവിട്ടത്.
