രാജ്യത്ത് തുടർച്ചയായ അഞ്ചാം ദിവസവും ഇന്ധനവില കൂട്ടി. പെട്രോളിന് 60 പൈസയും ഡീസലിന് 57 പൈസയുമാണ് വർധിച്ചത്. 5 ദിവസത്തിനിടെ പെട്രോൾ ലിറ്ററിന് 2 രൂപ 75 പൈസയും ഡീസലിന് 2 രൂപ 23 പൈസയും വര്‍ധിപ്പിച്ചു. ഇന്നലത്തെ വിലയിൽ നിന്നും അറുപത് പൈസയോളം വര്‍ധിച്ച് 75.72 രൂപയ്ക്കാണ് ഇന്ന് സംസ്ഥാനത്ത് പെട്രോള്‍ വിൽപന നടക്കുന്നത്. ഡീസലിന് 69.85 രൂപയാണ് ഇന്നത്തെ വില.
രാജ്യാന്തര വിപണിയിൽ അസംസ്കൃത എണ്ണ (ക്രൂഡ് ഓയിൽ) വില കുത്തനെ ഇടിഞ്ഞപ്പോൾ അതിന്റെ നേട്ടം ഉപയോക്താക്കൾക്ക് നല്‍കാത്ത എണ്ണക്കമ്പനികൾ, ക്രൂഡ് വില ഉയർന്നു തുടങ്ങിയതോടെ പെട്രോൾ– ഡീസൽ വിലകൾ തുടർച്ചയായി ഉയർത്തുകയാണ്.
ഉപഭോക്തൃ സംസ്ഥാനമായ കേരളത്തില്‍ ഇന്ധന വിലവര്‍ധനവ് അവശ്യസാധനങ്ങളുടെ വില വര്‍ധനവിനും കാരണമാകുമെന്നാണ് വിലയിരുത്തല്‍. ക്രൂഡ് ഓയില്‍ വില കുത്തനെയിടിഞ്ഞ സമയത്തും എക്സൈസ് തീരുവ വര്‍ധിപ്പിച്ച് ഇന്ധന വില വര്‍ധിപ്പിക്കുന്ന സമീപനമാണ് കേന്ദ്രസര്‍ക്കാര്‍ തുടര്‍ന്ന് വരുന്നത്.
