കൊവിഡിന്റെ പശ്ചാത്തലത്തില് വര്ധിപ്പിച്ച ബസ് ചാര്ജ് വര്ധന പിന്വലിച്ച സര്ക്കാര് നടപടി ഹൈക്കോടതി ഡിവിഷന് ബെഞ്ച് ശരിവെച്ചു. സര്ക്കാര് നടപടി താല്ക്കാലികമായാണ് കോടതി അംഗീകരിച്ചത്. ബസ് ചാര്ജ് വര്ധനവുമായി ബന്ധപ്പെട്ട കമ്മിറ്റി റിപ്പോര്ട്ട് രണ്ടാഴ്ചക്കകം സമര്പ്പിക്കണമെന്നും കോടതി ഉത്തരവിട്ടു. ഇതോടെ പഴയ നിരക്കിൽ തന്നെ ബസുകളിൽ യാത്ര ചെയ്യാം.
ലോക്ക്ഡൗണിലെ അസാധാരണമായ സാഹചര്യം കണക്കിലെടുത്താണ് ബസ് ചാര്ജ് 50 ശതമാനം വര്ധിപ്പിച്ചതെന്നും നിയന്ത്രണങ്ങള് മാറിയ പശ്ചാത്തലത്തിലാണ് ചാര്ജ് വര്ധനവ് പിന്വലിച്ചതെന്നും ചൂണ്ടികാട്ടിയാണ് സര്ക്കാര് അപ്പീല് സമര്പ്പിച്ചത്. കൊവിഡിന്റെ പശ്ചാത്തലത്തില് ബസ് ഉടമകള്ക്കുള്ള ടാക്സ് മൂന്ന് മാസത്തേക്ക് ഒഴിവാക്കി നല്കിയിട്ടുണ്ട്. അതിനാല് തന്നെ ഉടമകള്ക്ക് സാമ്പത്തിക ബുദ്ധിമുട്ട് ഉണ്ടാകുന്നില്ലെന്നും സര്ക്കാര് ചൂണ്ടികാട്ടി. ചാര്ജ് വര്ധന സംബന്ധിച്ച് ജസ്റ്റിസ് രാമചന്ദ്രന് കമ്മിറ്റി പരിശോധിച്ച് വരികയാണെന്നും സര്ക്കാര് കോടതിയെ അറിയിച്ചു.
