കൊല്ലം മുട്ടറ സ്കൂളിലെ വിദ്യാത്ഥികളുടെ കാണാതായ ഉത്തരക്കടലാസുകൾ തിരിച്ചു കിട്ടി. തിരുവനന്തപുരത്തെ റെയിൽവേ വാഗണിന്റെ അകത്ത് നിന്നാണ് ഉത്തരക്കടലാസുകൾ ലഭിച്ചത്. തപാൽ വകുപ്പ് ഉത്തരക്കടലാസുകൾ വിദ്യാഭ്യാസ വകുപ്പിന് കൈമാറിയതായി വാര്ത്ത പുറത്തുകൊണ്ടുവന്ന 'മീഡിയ വണ്' റിപ്പോര്ട്ട് ചെയ്യുന്നു.
ഹയർ സെക്കൻഡറി പരീക്ഷാഫലം പ്രസിദ്ധീകരിക്കാൻ ദിവസങ്ങൾ മാത്രം ബാക്കി നിൽക്കെയാണ് മുട്ടറ ഗവൺമെന്റ് ഹയർ സെക്കൻഡറി സ്കൂളിലെ കണക്ക് പരീക്ഷയുടെ ഉത്തരക്കടലാസുകൾ കാണാനില്ലെന്ന വാര്ത്ത പുറത്തുവരുന്നത്. പാലക്കാടേക്ക് മൂല്യനിർണയത്തിനായ അയച്ച 61 പേപ്പറുകളാണ് കാണാതായത്. ജൂലൈ 10ന് പരീക്ഷാഫലം വരാനിരിക്കെ ഉത്തരക്കടലാസുകൾ എത്രയും പെട്ടെന്ന് മൂല്യനിര്ണ്ണയം നടത്താനുള്ള തയ്യാറെടുപ്പിലാണ് അധികൃതര്. ഉത്തരക്കടലാസ് ലഭിച്ചില്ലെങ്കിൽ ആനുപാതികമായി മാർക്ക് നൽകാൻ വിദ്യാഭ്യാസ വകുപ്പ് ആലോചിച്ചിരുന്നു.
അതേസമയം, തലസ്ഥാനത്തെ ട്രിപ്പിൾ ലോക്ഡൗൺമൂലം പരീക്ഷാബോർഡ് കൂടി ഫലം അംഗീകരിക്കാന് സാധിക്കാത്തതിനാല് ഫലപ്രഖ്യാപനം വൈകും.
