രാജസ്ഥാനിലെ കോണ്‍ഗ്രസ് സര്‍ക്കാറിനെ അട്ടിമറിക്കാനുള്ള ശ്രമത്തിലാണ് ബിജെപിയെന്ന് മുഖ്യമന്ത്രി അശോക് ഗെലോട്ട്. മാരകമായ കൊറോണ വൈറസ് രാജ്യത്ത് ശക്തമായി പടര്‍ന്നു പിടിക്കുമ്പോഴും കോണ്‍ഗ്രസ് സര്‍ക്കാരിനെ അസ്ഥിരപ്പെടുത്താനായി ബി ജെ പി സംസ്ഥാനത്ത് രാഷ്ട്രീയം കളിക്കുകയണ്. എംഎല്‍എമാര്‍ക്ക് ബിജെപി 15 കോടി രൂപ വരെ വാഗ്ദാനം ചെയ്യുന്നുണ്ടെന്നും ഗെഹ്ലോട്ട് കുറ്റപ്പെടുത്തി.
''കൊവിഡ് -19 പ്രതിസന്ധി ഘട്ടത്തില്‍ സംസ്ഥാന സര്‍ക്കാര്‍ ജനങ്ങള്‍ക്ക് വേണ്ടി വിശ്രമമില്ലാതെ പ്രവര്‍ത്തിച്ചുകൊണ്ടിരിക്കയാണ്. എന്നാല്‍ ബിജെപി അപ്പോഴും പ്രശ്നങ്ങള്‍ സൃഷ്ടിക്കുന്നത് തുടരുകയാണ്'' - അദ്ദേഹം പറഞ്ഞു.
കഴിഞ്ഞ വര്‍ഷം കര്‍ണാടകയിലും ഈ ജൂണില്‍ മധ്യപ്രദേശിലും ഉണ്ടായ ബിജെപി നീക്കത്തെക്കുറിച്ചും ഗെലോട്ട് പരാമര്‍ശിച്ചു. 2014 ല്‍ ബിജെപി-ക്ക് കേന്ദ്രത്തില്‍ അധികാരം കിട്ടിയത് മുതല്‍ അവര്‍ വിവിധ സംസ്ഥാനങ്ങളില്‍ ഇതാണ് ചെയ്തുകൊണ്ടിരിക്കുന്നത്, ഗോവയിലും മധ്യപ്രദേശിലും വടക്കുകിഴക്കന്‍ സംസ്ഥാനങ്ങളിലുമൊല്ലാം.
നാണമില്ലാത്ത ബിജെപിക്കാര്‍ കഴിഞ്ഞ മാസം നടന്ന രാജ്യസഭാ തെരഞ്ഞെടുപ്പില്‍ വിജയിക്കാന്‍ ഗുജറാത്തിലും ഏഴ് എംഎല്‍എമാരെ വാങ്ങി. രാജസ്ഥാനിലും അവര്‍ ഇതുതന്നെ ചെയ്യാന്‍ ശ്രമിച്ചത്. പക്ഷേ ഞങ്ങള്‍ അവരെ തടഞ്ഞു, ഒരിക്കലും മറക്കാത്ത ഒരു പാഠം അവരെ പഠിപ്പിച്ചുവെന്നും ഗെലോട്ട് പറഞ്ഞു.
