ഇന്ത്യയിലെ കടുവ സെന്‍സസിന് ഗിന്നസ് റെക്കോഡ്

ഇന്ത്യയുടെ 2018 കടുവ സെന്‍സസ് ഗിന്നസ് ബുക്കില്‍ ഇടം നേടി. ലോകത്തെ ഏറ്റവും വലിയ ഓണ്‍-ക്യാമറ വന്യജീവി സര്‍വേ എന്ന നിലയിലാണ് ടൈഗര്‍ സെന്‍സസിന്റെ നേട്ടം. 2018 ല്‍ നടത്തിയ അഖിലേന്ത്യാ കടുവ എസ്റ്റിമേഷന്‍ പ്രകാരം 2,967 കടുവകളാണ് രാജ്യത്തുള്ളത്. 

സര്‍വേ പ്രകാരം ലോകത്തെ കടുവകളില്‍ എഴുപത്തഞ്ച് ശതമാനവും ഇപ്പോള്‍ ഇന്ത്യയിലാണ്. കഴിഞ്ഞ വര്‍ഷം ആഗോള കടുവ ദിനത്തില്‍ പ്രധാനമന്ത്രി നരേന്ദ്ര മോദിയാണ് ഇതിന്റെ ഫലങ്ങള്‍  പ്രഖ്യാപിച്ചത്.

26,838 ലൊക്കേഷനുകളില്‍ ക്യാമറകള്‍ സ്ഥാപിച്ച് 121,337 സ്‌ക്വയര്‍ കിലോമീറ്ററിലാണ് സര്‍വേ നടന്നത്. കടുവകളുടെ 76,651 ചിത്രങ്ങളാണ് ലഭിച്ചതെന്നും ഗിന്നസ് റെക്കോഡ് സാക്ഷ്യപ്പെടുത്തുന്നു. 2010 ല്‍ ഇന്ത്യയിലെ കടുവകളുടെ എണ്ണം 1706 ആയിരുന്നത് 2020 ആയപ്പോഴേക്കും 2967 ആയി.

'പ്രധാനമന്ത്രിയുടെ നേതൃത്വത്തില്‍, ഇന്ത്യയിലെ കടുവകളുടെ എണ്ണം ഇരട്ടിയാക്കാനുള്ള തീരുമാനം ഇന്ത്യ സങ്കല്‍പ് സേ സിധിയിലൂടെ ലക്ഷ്യമിട്ടതിന് നാല് വര്‍ഷം മുമ്പ് തന്നെ പൂര്‍ത്തീകരിച്ചുവെന്ന് കേന്ദ്ര പരിസ്ഥിതി മന്ത്രി പ്രകാശ് ജാവദേക്കര്‍ ട്വീറ്റ് ചെയ്തു'.