രാജ്യത്തിന്റെ സമഗ്രത കാത്തുസൂക്ഷിക്കുന്നതിനായി ജീവൻ ബലിയർപ്പിച്ച ധീരരായ സൈനികരെ ഓർത്തുകൊണ്ട് ഇന്ന് കാർഗിൽ വിജയ ദിവസം. വിജയ ദിവസത്തിന്റെ ഇരുപത്തിയൊന്നാം വാർഷികമാണ് രാജ്യം ഇന്ന് ആചരിക്കുന്നത്.
1999-ൽ കാർഗിൽ-ഡ്രാസ് മേഖലയിൽ പാക് സൈന്യം നുഴഞ്ഞുകയറി പിടിച്ചെടുത്ത ഇന്ത്യൻ പ്രദേശങ്ങൾ സൈന്യം തിരിച്ചുപിടിച്ചതിന്റെ വാർഷികമാണ് കാർഗിൽ വിജയ് ദിവസായി ആചരിക്കുന്നത്. ഓപ്പറേഷൻ വിജയ് എന്നായിരുന്നു ദൗത്യത്തിന് നൽകിയ പേര്. ഓപ്പറേഷൻ വിജയ് ആത്യന്തികമായി വിജയം കൈവരിക്കുന്നതിന് ഒരു ദിവസം മുമ്പ് എന്താണ് അവിടെ സംഭവിച്ചതെന്ന് ഇന്ത്യൻ സൈന്യം ജൂലൈ 25ന് ട്വീറ്റ് ചെയ്തിരുന്നു. "ഇന്ത്യൻ സൈന്യം മുസ്കോ താഴ്വരയിലെ സുലു ടോപ്പിൽ നിന്നും ശക്തമായ ആക്രമണം നടത്തി. നമ്മുടെ സൈനികരുടെ ധൈര്യവും, അചഞ്ചലമായ ദൃഢനിശ്ചയവും ആ പോരാട്ടത്തെ വിജയത്തിലേക്ക് നയിച്ചു." സൈന്യം ട്വീറ്റ് ചെയ്തു.
രാജ്യത്തിന്റെ ഐക്യം സംരക്ഷിക്കുന്നതിനായി ജീവത്യാഗം ചെയ്ത ഇന്ത്യൻ സൈനികരുടെ ഓര്മ്മക്കായാണ് ജൂലൈ 26 ആചരിക്കുന്നത്. ഭൂനിരപ്പിൽ നിന്ന് 12,000 അടി ഉയരത്തിലുള്ള ഡ്രാസ്, കക്സാർ, ബറ്റാലിക്, തുർതുക് മേഖലകളിലാണ് സൈന്യം ഐതിഹാസിക പോരാട്ടങ്ങൾ നടത്തിയത്.
