തിരുവനന്തപുരം മേനംകുളം കിൻഫ്രാ അപ്പാരൽ പാർക്കിൽ 88 കയറ്റിറക്ക് തൊഴിലാളികൾക്ക് കൊവിഡ്. ഇന്നലെ ഇവിടെ ഒരാളിൽ രോഗം കണ്ടെത്തിയിരുന്നു. ഇതിനെ തുടർന്നാണ് എല്ലാ തൊഴിലാളികളെയും ആന്റിജൻ പരിശോധനക്ക് വിധേയരാക്കിയത്. 298 പേരെയാണ് പരിശോധിച്ചത്. ഇവരിൽ 88 പേർക്കാണ് രോഗം സ്ഥിരീകരിച്ചത്. സ്വകാര്യ, സർക്കാർ ഉടമസ്ഥതയിൽ ഏകദേശം നൂറോളം സ്ഥാപനങ്ങലാണ് കിൻഫ്രാ പാർക്കിലുള്ളത്. നിരവധി പ്രദേശങ്ങളിലേക്ക് ഇവിടെ നിന്ന് ലോറികളിൽ ചരക്ക് നീക്കം നടക്കുന്നുണ്ട്. അതു കൊണ്ട് തന്നെ ഇവിടുത്തെ രോഗവ്യാപനം ഗുരുതരമായ പ്രശ്നങ്ങൾ സൃഷ്ടിക്കുമെന്ന ആശങ്കയിലാണ് ആരോഗ്യ വകുപ്പ്. കൂടാതെ ടെസ്റ്റുകളുടെ എണ്ണം വർദ്ധിപ്പിക്കുന്നതിന് അനുസിരിച്ച് പോസിറ്റീവ് കേസുകളും ജില്ലയിൽ കൂടുന്നുണ്ട്.
സെക്രട്ടറിയേറ്റിൽ ഗാർഡ് ഡ്യൂട്ടിയിലുള്ള പൊലീസുകാരനും കൊവിഡ് സ്ഥിരീകരിച്ചു. നെയ്യാറ്റിൻകര സ്വദേശിയായ ഇയാൾ ഇന്നലെ വരെ ഡ്യൂട്ടിയിൽ ഉണ്ടായിരുന്നു.അതോടൊപ്പം പൂവാർ ഫയർ സ്റ്റേഷനിലെ 9 പേർക്കും കൊവിഡ് സ്ഥിരീകരിച്ചു. 18 പേരെ പരിശോധിച്ചപ്പോഴാണ് ഇത്രയും പേർക്ക് രോഗം സ്ഥിരീകരിച്ചത്. കഴിഞ്ഞി ദിവസം ഇവിടെ 3 പേരുടെ പരിശോധനാ ഫലം പോസിറ്റീവായിരുന്നു. ഇതേ തുടർന്നാണ് കൂടുതൽ പേരിൽ പരിശോധന നടത്തിയത്.
