ശ്രീനഗര്: ജമ്മു കാശ്മീര് മുന് മുഖ്യമന്ത്രിയും പീപ്പിള്സ് ഡെമോക്രാറ്റിക് പാര്ട്ടി (പി ഡി പി ) അധ്യക്ഷയുമായ മെഹബൂബ മുഫ്തിയുടെ തടങ്കല് കാലാവധി വീണ്ടും നീട്ടി. നവംബര് 5 വരെ മൂന്നു മാസത്തേക്കാണ് വീണ്ടും തടങ്കല് നീട്ടിയത്. ഈ മാസം 5-ാം തീയതി വന്നാല് മെഹബൂബ മുഫ്തിയുടെ തടങ്കല് വാസം ഒരു വര്ഷമാകുകയാണ്. കഴിഞ്ഞ വര്ഷം ആഗസ്ത് 5 ന് ഭരണഘടനയിലെ 370-ാം വകുപ്പ് എടുത്തുകളയുകയും ജമ്മു കാശ്മീരിന്റെ പ്രത്യേക പദവി എടുത്തുകളയുകയും ചെയ്തത്. ഇതേ തുടര്ന്ന് വീട്ടു തടങ്കലിലാക്കപ്പെട്ട മെഹബൂബയെ ഔദ്യോഗിക വസതിയായ ഫെയര് വ്യു ബംഗ്ലാവില് തന്നെയാണ് തടവില് പാര്പ്പിച്ചിരിക്കുന്നത്.
അതേസമയം മെഹബൂബ മുഫ്തി മുഖ്യമന്ത്രിയായിരിക്കെ അവരുടെ നേതൃത്വത്തിലുണ്ടായിരുന്ന ബിജെപി- പിഡിപി സര്ക്കാരില് മന്ത്രിയായിരുന്ന ജെ കെ പി സി നേതാവ് സജ്ജാദ് ഗനി ലോണ് മോചിപ്പിക്കപ്പെട്ടു. നേരത്തെ തടങ്കലിലായിരുന്ന മുന് മുഖ്യമന്ത്രിമാരായ ഫാറൂഖ് അബ്ദുള്ള, ഒമര് അബ്ദുള്ള. സിപിഎം നേതാവ് മൊഹമ്മദ് യൂസഫ് തരിഗാമി എന്നിവരെ നേരത്തെ പല സന്ദര്ഭങ്ങളിലായി മോചിപ്പിച്ചിരുന്നു. എന്നാല് തങ്ങളുടെ പഴയ ഘടക കക്ഷി നേതാവും സഖ്യകക്ഷി സര്ക്കാരിന്റെ മുഖ്യമന്ത്രിയുമായിരുന്ന മെഹബൂബയെ മോചിപ്പിക്കാന് കേന്ദ്രം ഭരിക്കുന്ന ബി ജെ പി യും കേന്ദ്ര സര്ക്കാരും തയ്യാറാവാത്തത് അത്ഭുതത്തോടെയാണ് രാഷ്ട്രീയ നിരീക്ഷകര് കാണുന്നത്.