സംസ്ഥാനത്ത് സ്വര്ണ വില പവന് 200 രൂപകൂടി 41,520 രൂപയായി. കഴിഞ്ഞ മൂന്നു ദിവസത്തിനിടെ 1240 രൂപയാണ് കൂടിയത്. കഴിഞ്ഞ വെള്ളിയാഴ്ചയായിരുന്നു പവന് വില ആദ്യമായി 40,000 രൂപയിലെത്തിയത്. ജൂലായ് മുതലുള്ള കണക്കെടുത്താല് 5,720 രൂപയുടെ വര്ധനയാണ് ഇതുവരെയുണ്ടായത്.
ആഗോളതലത്തില് സമ്പദ് ഘടന ദുര്ബലമായതാണ് തുടര്ച്ചയായി വില ഉയരാന് കാരണം. കോവിഡും ലോക്ക്ഡൌണും കാരണം സാമ്പത്തിക പ്രതിസന്ധി രൂക്ഷമായപ്പോള് സുരക്ഷിത നിക്ഷേപമായി സ്വര്ണം മാറി. ആഗോള വിപണികളില് സ്വര്ണവില എട്ട് വര്ഷത്തെ ഉയര്ന്ന നിരക്കിലാണിപ്പോള്. രൂപയുടെ മൂല്യമിടിവ് കൂടിയായതോടെ ആഭ്യന്തര വിപണിയില് സ്വര്ണവില സര്വ റെക്കോര്ഡുകളും ഭേദിക്കുകയാണ്.
കോവിഡ് വ്യാപനംമൂലം വിവിധ രാജ്യങ്ങള് സമ്പദ്ഘടനയ്ക്ക് കരുത്തുപകരാന് സാമ്പത്തിക പാക്കേജുകളുമായി മുന്നോട്ടുപോകുമെന്ന പ്രതീക്ഷയാണ് സ്വര്ണവില തുടര്ച്ചയായി വര്ധിക്കുന്നതിനുപിന്നില്.