ലൈംഗിക വിദ്യാഭ്യാസവും ബോധവൽക്കരണവും സ്കൂൾതലം മുതൽ നൽകണമെന്ന് വനിതാ കമീഷൻ. അപകടം പതിയിരിക്കുന്ന ചുറ്റുപാടിനെക്കുറിച്ച് കുട്ടികൾക്ക് മനസ്സിലാക്കുന്നതിനായി ലൈംഗിക വിദ്യാഭ്യാസം അത്യാവശ്യമാണെന്ന് കമ്മീഷൻ അംഗം ഇ.എം രാധ പറഞ്ഞു. "കുട്ടികൾക്കെതിരെയുള്ള നിരവധി അതിക്രമങ്ങളാണ് ബോധവൽക്കരണങ്ങളിലൂടെ പുറത്തുവന്നത്, പോക്സോ കേസ് വർധിച്ചുവരുന്നു"- വനിതാ കമ്മീഷൻ അംഗം പറഞ്ഞു.
കണ്ണൂരിൽ വനിതാ കമ്മീഷൻ അദാലത്തിൽ സംസാരിക്കുകയായിരുന്നു ഇ.എം രാധ. വിവാഹസമയത്തുള്ള സ്വർണവും വിദ്യാഭ്യാസ സർട്ടിഫിക്കറ്റുകളും തിരിച്ചു കിട്ടിയില്ലെന്ന പരാതികളും കൂടിവരികയാണ്. ഉന്നത വിദ്യാഭ്യാസമുള്ള പെൺകുട്ടികളുടെ സർട്ടിഫിക്കറ്റുകൾ ഭർതൃവീട്ടുകാർ നശിപ്പിക്കുന്നതായും ശ്രദ്ധയിൽപ്പെട്ടിട്ടുണ്ട്. സ്വർണവും സർട്ടിഫിക്കറ്റുകളും ലോക്കറുകളിലാക്കി പെൺകുട്ടികൾ തന്നെ സൂക്ഷിക്കണമെന്നും ഇ എം രാധ നിർദേശിച്ചു. വിവാഹം കഴിഞ്ഞ് 14 ദിവസത്തിനുശേഷം ബഹ്റൈനിലേക്ക് പോയി തിരികെയെത്താതിരുന്ന യുവാവിനെ എംബസി മുഖാന്തിരം നാട്ടിലേക്ക് തിരിച്ചെത്തിക്കുന്നതിനുള്ള നടപടി വനിതാ കമീഷൻ സ്വീകരിച്ചു.