ബംഗളൂരു മയക്കുമരുന്നു കേസിൽ തെന്നിന്ത്യൻ സിനിമാ നടി സഞ്ജന ഗൽറാണി അറസ്റ്റിൽ. കർണാടക സെൻട്രൽ ക്രൈംബ്രാഞ്ചാണ് സഞ്ജനയെ അറസ്റ്റ് ചെയ്തത്. കഴിഞ്ഞ ദിവസം ഇന്ദിരാ നഗറിലെ ഇവരുടെ വീട്ടിൽ ക്രൈംബ്രാഞ്ച് റെയ്ഡ് നടത്തിയിരുന്നു. റെയ്ഡിൽ നിർണായകമായ തെളിവുകൾ ലഭിച്ചതിന്റെ അടിസ്ഥാനത്തിലാണ് അറസ്റ്റിലേക്ക് കടന്നത്. കോടതിയുടെ സെർച്ച് വാറണ്ട് ലഭിച്ചതിന് ശേഷമായിരുന്നു പരിശോധന. ഗൽറാണിയോട് ചോദ്യം ചെയ്യലിന് ഹാജരാകാൻ നേരത്തെ ക്രൈംബ്രാഞ്ച് ആവശ്യപ്പെട്ടിരുന്നു. എന്നാൽ ക്രൈംബ്രാഞ്ചിന്റെ നിർദ്ദേശത്തോട് അനുകൂലമായല്ല ഗൽറാണി പ്രതികരിച്ചത്.
ഗൽറാണിയുടെ സുഹൃത്തും മലയാളിയുമായ നിയാസ് മുഹമ്മദിനെയും കേസിൽ ക്രൈംബ്രാഞ്ച് അറസ്റ്റ് ചെയ്തിട്ടുണ്ട്. കേസിൽ ഇതുവരെ ആറ് പേരാണ് അറസ്റ്റിലായത്. ഗൽറാണിയും നിയാസും തമ്മിൽ ഏറെക്കാലമായി പരിചയമുണ്ടെന്നാണ് ക്രൈംബ്രാഞ്ച് പറയുന്നത്. ഏതാനും മലയാള സിനിമകളിലും നിയാസ് വേഷമിട്ടിട്ടുണ്ട്. ടൊവീനോ തോമസ് നായകനായ കൽക്കി എന്ന ചിത്രത്തിൽ വില്ലൻ വേഷത്തിൽ നിയാസ് അഭിനയിച്ചിട്ടുണ്ട്. മലയാളത്തിലെ പല പ്രമുഖ താരങ്ങളുമായി നിയാസിന് അടുത്ത ബന്ധമുള്ളതായി അന്വേഷണ സംഘത്തിന് വിവരം ലഭിച്ചിട്ടുണ്ട്.
മലയാളത്തിൽ നിരവധി ചിത്രങ്ങളിൽ വേഷമിട്ട നിക്കി ഗൽറാണിയുടെ സഹോദരിയാണ് സഞ്ജനാ ഗൽറാണി. ബംഗളൂരുവിൽ സ്ഥിരതാമസമാക്കിയ സഞ്ജന 2006 മുതൽ അഭിനയ രംഗത്ത് സജീവമാണ്.
