ഡല്ഹി: സ്ത്രീവിരുദ്ധ പരാമര്ശത്തിന് വീണ്ടും വിവാദത്തിലായി സുപ്രീംകോടതി മുന് ജഡ്ജി ജസ്റ്റിസ് മാര്ക്കണ്ഡേയ കട്ജു. ഫെയ്സ്ബുക്കില് തന്റെ പോസ്റ്റിന് താഴെ കമന്റുമായെത്തിയ പെണ്ക്കുട്ടിയ്ക്ക് കട്ജു നല്കിയ മറുപടിയാണ് വിവാദമായത് .
'ഉറക്കമില്ലേ? ഞാന് കരുതിയത് നല്ല പെണ്ക്കുട്ടികള് നേരത്തേ ഉറങ്ങുമെന്നാണ് !' എന്നായിരുന്നു യുവതിയുടെ കമന്റിലെ കട്ജുവിന്റെ പരാമര്ശം. ട്വിറ്റര് ഉള്പ്പടെയുളള സാമൂഹിക മാധ്യമങ്ങളില് കട്ജുവിന്റെ പരാമര്ശത്തിനെതിരെ വ്യാപക പ്രതിഷേധമാണ് ഉയരുന്നത്. സ്ത്രീവിരുദ്ധ പരാമര്ശങ്ങളുടെ പേരില് നേരത്തേയും കട്ജു വിമര്ശിക്കപ്പെട്ടിട്ടുണ്ട്. 2015ല് ബി.ജെ.പിയുടെ എംപി ഷാസിയ ഇല്മിയെയും കിരണ് ബേദിയെയും താരതമ്യപ്പെടുത്തി ആരാണ് കൂടുതല് സുന്ദരിയെന്ന കട്ജുവിന്റെ ചോദ്യം വിമര്ശനത്തിന് ഇടയാക്കിയിരുന്നു.
ഞാന് കരുതുന്നത് കിരണ് ബേദിയേക്കാള് സുന്ദരിയാണ് ഷാസിയ ഇല്മിയ എന്നാണ്, ഷാസിയയെ ബിജെപി അവരുടെ മുഖ്യമന്ത്രി സ്ഥാനാര്ത്ഥിയാക്കിയിരുന്നെങ്കില്, ദില്ലി തെരഞ്ഞെടുപ്പില് അവര് തീര്ച്ചയായും വിജയിക്കുമായിരുന്നു. മനോഹരമായ മുഖങ്ങള്ക്കാണ് ആളുകള് വോട്ട് ചെയ്യുന്നതെന്നും കട്ജു അന്ന് തന്റെ പോസ്റ്റില് പറഞ്ഞിരുന്നു. രാജ്യത്തെ സുപ്രീംകോടതി കോടതി വിധികളെയും ജഡ്ജിമാരെയും വിമര്ശിച്ച് ജനശ്രദ്ധ പിടിച്ചുപറ്റിയ ന്യായാധിപനാണ് ജസ്റ്റിസ് മാര്ക്കണ്ഡേയ കട്ജു.