സംസ്ഥാനത്ത് തുടർച്ചയായ മൂന്നാം ദിവസവും സ്വർണവില കുറഞ്ഞു. ഇന്ന് പവന് 80 രൂപയാണ് കുറഞ്ഞത്. ഇതോടെ 37,280 രൂപയാണ് ഇന്നത്തെ വില. ഗ്രാമിന് 4660 രൂപയുമാണ്. ദേശീയ വിപണിയിലും സ്വർണ വില കുറഞ്ഞു. എംസിഎക്‌സില്‍ 10 ഗ്രാം തനിത്തങ്കത്തിന്റെ വില 50,305 രൂപ നിലവാരത്തിലാണ്.
ആതേസമയം, ആഗോള വിപണിയില്‍ സ്വര്‍ണവില സ്ഥിരതയാര്‍ജിച്ചു. സ്‌പോട്ട് ഗോള്‍ഡ് വില ഔണ്‍സിന് 1,884.67 ഡോളറിലാണ് വ്യാപാരം നടക്കുന്നത്. നിലവിലെ സ്വർണ വിലയിലെ ഇടിവ് വഴി കൊമെക്സിൽ 1840 മുതൽ 1850 വരെയും ആഭ്യന്തര രംഗത്ത് 49,000 രൂപയിലും സ്വർണം വാങ്ങുന്നതിനുള്ള സുവർണ്ണാവസരമാണിതെന്ന് നിരീക്ഷക‍ർ പറയുന്നു.
അമേരിക്കയടക്കമുള്ള രാജ്യങ്ങളില്‍ കൊവിഡ് രൂക്ഷമായതും സാമ്പത്തിക രംഗം തകര്‍ന്നതും ആഗോളതലത്തില്‍ സ്വര്‍ണ്ണത്തിന്റെ മൂല്യം കുതിച്ചുയരാന്‍ കാരണമായിരുന്നു. എന്നാല്‍, അമേരിക്കയില്‍ പൊതു തെരഞ്ഞെടുപ്പ് നടക്കാനിരിക്കുന്നതാണ് ഇപ്പോള്‍ വില കുറയാന്‍ കാരണം. 2019 ൽ സ്വ‍ർണത്തിന് ഏകദേശം 19 ശതമാനം നേട്ടമുണ്ടായപ്പോൾ 2020 ൽ ഇന്ത്യയിൽ സ്വർണ വില 40 ശതമാനമാണ് ഉയർന്നത്.
