തിരുവനന്തപുരം സ്വർണകള്ളക്കടത്ത് കേസിൽ എൻഫോഴ്സ്മെന്റ് ഡയറക്ടറേറ്റ് കുറ്റപത്രം സമർപ്പിച്ചു. കേസിലെ പ്രതികളായ സ്വപ്ന സ്വുരേഷ്, സന്ദീപ്, സരിത്ത് എന്നിവർക്കെതിരെയുള്ള കുറ്റപത്രമാണ് സമർപ്പിച്ചത്. പ്രതികൾ കള്ളപ്പണ ഇടാപാട് നടത്തിയെന്നും, കള്ളപ്പണം വെളുപ്പിച്ചെന്നും കുറ്റപത്രത്തിൽ പറയുന്നു. പ്രാഥമിക കുറ്റപത്രമാണ് ഇഡി സമർപ്പിച്ചിരിക്കുന്നത്. 303 പേജുള്ള കുറ്റപത്രമാണ് തിരുവനന്തപുരം അഡീഷണൽ സെഷൻസ് കോടതിയിൽ സമർപ്പിച്ചത്.
കുറ്റം തെളിഞ്ഞ സാഹചര്യത്തിൽ പ്രതികൾക്ക് ജാമ്യം അനുവദിക്കരുതെന്ന് ഇഡി കോടതിയിൽ ആവശ്യപ്പെടും. കേസിൽ പ്രതികളുടെ ജാമ്യം കോടതി പരിഗണിക്കാനിരിക്കെയാണ് ഇഡി പ്രാഥമിക കുറ്റപത്രം സമർപ്പിച്ചത്. കേസിൽ ബാക്കിയുള്ള പ്രതികൾക്കെതിരെ അന്വേഷണം പുരോഗമിക്കുകയാണ്. പ്രതികളിൽ നിന്ന് കണ്ടെടുത്ത ഡിജിറ്റൽ തെളിവുകളിൽ അന്വേഷണം പുരോഗമിക്കുകയാണ്. ഇത് പൂർത്തിയായ ശേഷം അന്തിമ കുറ്റപത്രം സമർപ്പിക്കുമെന്ന് ഇഡി വ്യക്തമാക്കി.