ജനനമരണങ്ങൾ രജിസ്റ്റർ ചെയ്യുന്നതിന് ആധാർ നമ്പർ നിർബന്ധമല്ലെന്ന് യൂണിയൻ ഓഫ് ഇന്ത്യ രജിസ്ട്രാർ ജനറൽ . ആന്ധ്രാ സ്വദേശിയായ എംവിഎസ് അനിൽ കുമാർ രാജഗിരി നൽകിയ വിവരാവകാശ അപേക്ഷയ്ക്ക് മറുപടിയായാണ് ഈ വിശദീകരണം. മരണം രജിസ്റ്റർ ചെയ്യുന്നതിന് ആധാർ നിർബന്ധമാണോ എന്ന ചോദ്യത്തിനാണ് മറുപടി നൽകിയത്.
ജനനമരണ രജിസ്ട്രേഷന് ആധാർ നിർബന്ധമാക്കിയ നിയമം നിലവിലില്ലെന്ന് മറുപടിയിലുണ്ട്. സ്വീകാര്യമായ രേഖകളിലൊന്നായതിനാൽ ആധാർ നമ്പറിന്റെയോ എൻറോൾമെന്റ് ഐഡി നമ്പറിന്റെയോ പകർപ്പ് നൽകാമെന്ന് മന്ത്രാലയം വ്യക്തമാക്കി.ഒരു സാഹചര്യത്തിലും ആധാർ നമ്പർ ഡാറ്റാബേസിൽ സേവ് ചെയ്യുകയോ ഏതെങ്കിലും രേഖയിൽ അച്ചടിക്കുകയോ ചെയ്യരുത്. ആവശ്യമെങ്കിൽ ആധാർ നമ്പറിന്റെ അവസാന നാല് അക്കങ്ങൾ രേഖപ്പെടുത്താമെന്ന് സർക്കുലറിലുണ്ട്.
