തിരുവനന്തപുരം: സംസ്ഥാനത്ത് പുതിയ അധ്യയന വര്ഷത്തിലെ പ്ലസ് വണ് ക്ലാസുകള് ഓണ് ലൈനായി അടുത്തമാസം (നവംബര്) 2 മുതല് ആരംഭിക്കുമെന്ന് വിദ്യാഭ്യാസ വകുപ്പ് അറിയിച്ചു. അഡ്മിഷന് പൂര്ത്തിയായ മുറയ്ക്കാണ് ഇപ്പോള് ക്ലാസ്സുകള് ആരംഭിക്കാന് തീരുമാനമായത്. https://firstbell.kite.kerala.gov.in വഴിയാണ് വിദ്യാര്ഥികള്ക്ക് ക്ലാസ് കാണാന് കഴിയുക. രാവിലെ 9-30 മുതല് 10-30 വരെയാണ് പ്ലസ് വണ് ക്ലാസുകള് സംപ്രേക്ഷണം ചെയ്യുക. ഇതോടെ 45 ലക്ഷം പ്ലസ് വണ് വിദ്യാര്ഥികള് ഓണ് ലൈന് ക്ലാസ്സിന്റെ ഭാഗമാകും.
സംസ്ഥാനത്ത് കൊവിഡ് വ്യാപനം രൂക്ഷമാകുന്ന സാഹചര്യത്തില് വിദ്യാലയങ്ങള് എപ്പോള് തുറക്കാനാവുമെന്ന് സര്ക്കാറിന് ഇപ്പോഴും വ്യക്തതയില്ല. ഒരുപക്ഷെ ഈ അധ്യയന വര്ഷം പൂര്ണ്ണമായും ഓണ് ലൈനായിത്തന്നെ ക്ലാസ്സുകള് നടത്തേണ്ടിവരുമെന്നും വിദഗ്ദര് അഭിപ്രായപ്പെടുന്നുണ്ട്. ഈ സാഹചര്യത്തില് ഓണ്ലൈന് ക്ലാസ്സുകള് കൂടുതല് മികച്ച രീതിയില് നടത്തുന്നതിനാണ് വിദ്യാഭ്യാസ വകുപ്പ് ഊന്നല് നല്കുന്നത്.
നിലവില് എല്ലാവിഭാഗം വിദ്യാര്ഥികള്ക്കുമുള്ള ഓണ്ലൈന് ക്ലാസ്സുകള് ഒറ്റ പോര്ട്ടലില് ലഭ്യമാകും. അവധി ദിവസങ്ങള് കൂടി ക്ലാസുകള്ക്കായി പ്രയോജനപ്പെടുത്താനാണ് സര്ക്കാര് തീരുമാനം. കിളിക്കൊഞ്ചല് എന്ന പേരില് പ്രീ പ്രൈമറി വിഭാഗം വിദ്യാര്ഥികള്ക്കായുള്ള ക്ലാസ്സുകള് മാസത്തിലെ ആദ്യ ശനി, ഞായര് ദിവസങ്ങളിലാണ് നടക്കുക. ഈ മാതൃകയില് പ്ലസ് വണ്, പ്ലസ് ടു വിഭാഗത്തിലെയും ചില ക്ലാസ്സുകള് അവധി ദിവസങ്ങളില് നടത്തും.