കോൺഗ്രസ്‌ നേതാവ് കമൽനാഥിന്റെ വിവാദ പ്രസ്താവനയിൽ തെരഞ്ഞെടുപ്പ് കമ്മീഷന്റെ താക്കീത്. മധ്യപ്രദേശ് തെരഞ്ഞെടുപ്പ് പ്രചാരണത്തിനിടെ വനിത ബിജെപി സ്ഥാനാർഥിക്ക് നേരെ നടത്തിയ 'ഐറ്റം' പരാമർശത്തിലാണ് കമ്മീഷന്റെ താക്കീത്.
ഇനി മേലിൽ അത്തരത്തിലുള്ള പരാമർശങ്ങൾ നടത്തരുതെന്ന് കമ്മീഷൻ അദ്ദേഹത്തിന് മുന്നറിയിപ്പ് നൽകി. സ്ത്രീവിരുദ്ധ പരാമർശം നടത്തിയതിന് കമ്മീഷൻ കമൽനാഥിനോട് നേരത്തെ വിശദീകരണം തേടിയിരുന്നു. തന്നെക്കാൾ കൂടുതൽ അവരെ നിങ്ങള്‍ക്ക് അറിയാമെന്നും എന്തൊരു ഐറ്റമാണിവര്‍ എന്നുമാണ് കമൽനാഥ് പറഞ്ഞത്.
ബിജെപി സ്ഥാനാർഥിയായ ഇമർതി ദേവിക്കെതിരെയാണ് കമൽനാഥ് വിവാദ പരാമർശം നടത്തിയത്. കോണ്‍ഗ്രസില്‍ നിന്ന് കൂറുമാറി ബിജെപി ടിക്കറ്റില്‍ മത്സരിക്കുന്നയാളാണ് ഇമർതി ദേവി. മധ്യപ്രദേശ് വനിതാ ശിശുക്ഷേമ വകുപ്പ് മന്ത്രി കൂടിയായ ഇവരെ 'ഐറ്റം'എന്ന് പരാമർശിച്ചു കൊണ്ടായിരുന്നു കമൽനാഥിന്റെ പ്രസംഗം. സംഭവം വിവാദമായതോടെ പരാമര്‍ശത്തില്‍ ഖേദം പ്രകടിപ്പിച്ച് കമല്‍നാഥ് രംഗത്തെത്തിയിരുന്നു.
