ഇംഫാല്: മണിപ്പൂര് ഹയര് സെക്കണ്ടറി സ്കൂള് ചോദ്യപേപ്പറാണ് വിചിത്രമായ ചോദ്യങ്ങളാല് ഇപ്പോള് ദേശീയ ശ്രദ്ധ ആകര്ഷിച്ചിരിക്കുന്നത്. പ്ലസ് ടു പൊളിറ്റിക്കല് സയന്സ് ചോദ്യപേപ്പറില് മുന് പ്രധാനമന്ത്രി ജവഹര് ലാല് നെഹ്റുവിനെ കുറിച്ചുള്ള പ്രത്യക്ഷ ചോദ്യം ഇങ്ങനെ
1.''രാഷ്ട്ര നിര്മ്മാണത്തില് ജവഹര് ലാല് നെഹ്രുവിന് സംഭവിച്ച നാലു പിഴവുകള് ചൂണ്ടിക്കാട്ടുക ?''
2. ബിജെപി-യുടെ ചിഹ്നമായ ' താമര ' വരയ്ക്കുക ?
ഇത്തരം ചോദ്യങ്ങളാണ് വലിയ ആക്ഷേപത്തിന് കാരണമായിരിക്കുന്നത്. മുന് പ്രധാനമന്ത്രി ജവഹര്ലാല് നെഹ്രുവിനെ ആക്ഷേപിക്കാനും അദ്ദേഹത്തെ പുതുതലമുറക്ക് മുന്നില് നെഗറ്റീവായി അവതരിപ്പിക്കാനുമുള്ള ശ്രമമാണ് മണിപ്പൂര് ഭരിക്കുന്ന ബിജെപി സര്ക്കാരിന്റെ ഭാഗത്തുനിന്നുണ്ടായിരിക്കുന്നത് എന്ന് കോണ്ഗ്രസ് ആരോപിച്ചു.
എന്നാല് ഇത്തരം ചോദ്യങ്ങള് എങ്ങനെ കടന്നുകൂടി എന്നതിനെ സംബന്ധിച്ച് തങ്ങള്ക്കു യാതൊരു അറിവുമില്ലെന്നും ബന്ധപ്പെട്ട വകുപ്പ് മാത്രമാണ് ചോദ്യങ്ങള് തയറാക്കുന്നതെന്നും മണിപ്പൂര് ബിജെപി വക്താവ് ചോങ്ങ്തം ബിജോയ് പറഞ്ഞു. തങ്ങള് ഇത്തരം കാര്യങ്ങളില് ഇടപെടാറില്ലെന്നും ബിജെപി വക്താവ് കൂട്ടി ചേര്ത്തു.
എന്നാല് ചോദ്യങ്ങളെല്ലാം സിലബസ്സില് നിന്ന് മാത്രമാണെന്നായിരുന്നു ഹയര് സെകണ്ടറി എജുക്കേഷന് ചെയര്മാന് മഹേന്ദ്ര സിംങ്ങിന്റെ വിശദീകരണം ഇതോടെ വിവാദം ചൂടു പിടിച്ചിരിക്കുകയാണ്. ചോദ്യങ്ങള് സിലബസ്സില് നിന്നാണെങ്കില് സിലബസ് തന്നെ വിവാദത്തിലാകുമെന്ന പ്രതികരണവും പ്രതിപക്ഷ കക്ഷികളില് നിന്ന് ഉയര്ന്നു കഴിഞ്ഞു.
കോണ്ഗ്രസ് നേതൃത്വത്തിലുള്ള മുന്നണിയാണ് കഴിഞ്ഞ മണിപ്പൂര് നിയമസഭാ തെരഞ്ഞെടുപ്പില് ഭൂരിപക്ഷം നേടിയത്. എന്നാല് സ്വതന്ത്രരുടെയും ചെറുകക്ഷികളുടെയും പിന്തുണയോടെ ബിജെപി അധികാരം പിടിച്ചെടുക്കുകയായിരുന്നു. ബിരെന് സിങ്ങിന്റെ നേതൃത്വത്തിലുള്ള സര്ക്കാരാണ് ഇപ്പോള് ഭരണത്തിലുള്ളത്.
