ഉത്സവ ദിവസങ്ങളിൽ 2 മണിക്കൂർ പച്ച നിറത്തിലുള്ള പടക്കങ്ങൾ പൊട്ടിച്ച് ആഘോഷിക്കാമെന്ന് സുപ്രീം കോടതി. വായു മലിനീകരണം രൂക്ഷമാകുന്ന സാഹചര്യത്തിൽ ഉത്സവ ദിവസങ്ങളിൽ പടക്കങ്ങൾ പൊട്ടിക്കരുത് എന്ന തെലങ്കാന ഹൈക്കോടതി വിധിയെ പരാമർശിച്ചുകൊണ്ടാണ് സുപ്രീം കോടതിയുടെ പുതിയ ഉത്തരവ്. ദീപാവാലി, ഛത് പൂജ, ഗുരുപൂരബ്, ക്രിസ്മസ്, ന്യൂ ഇയർ എന്നീ ആഘോഷങ്ങൾക്കാണ് അനുമതി.
തെലങ്കാനാ പടക്കവ്യാപാരി സംഘടന നൽകിയ പരാതിയിന്മേലാണ് സുപ്രീം കോടതിയുടെ ഉത്തരവ്. നാഷണൽ ഗ്രീൻ ട്രിബൂണൽ പച്ച നിറത്തിലുള്ള പടക്കങ്ങൾ പൊട്ടിക്കാമെന്ന് പറഞ്ഞെങ്കിലും ഹൈക്കോടതി വിധി ആശയക്കുഴപ്പം സൃഷ്ടിക്കുന്നു എന്നാണ് സംഘടന പരാതി നൽകിയത്.
പടക്കങ്ങൾ പൊട്ടിക്കുന്നത് അന്തരീക്ഷ മലിനീകരണത്തിന് കാരണമാകുമെന്നും ഇത് കൊവിഡ് രോഗികളുടെ ആരോഗ്യനില വഷളാക്കാനും, കൊവിഡ് അതീവജാഗ്രത പട്ടികയിൽ ഉള്ളവർക്ക് ഭീഷണിയാകാനും സാധ്യതയുണ്ടെന്ന് ചൂണ്ടിക്കാട്ടിയാണ് ഹൈക്കോടതി ആഘോഷദിവസങ്ങളില് പടക്കങ്ങള് നിരോധിച്ചത്. ആഘോഷങ്ങളേക്കാള് പ്രാധാന്യം ജനങ്ങളുടെ ജീവനാണെന്നും കോടതി പറഞ്ഞിരുന്നു.
