ദോഹ: മനുഷ്യക്കടത്ത് നടത്തി ഇരകളെ കടുത്ത ശാരീരിക മാനസിക പീഡനത്തിന് ഇരയാക്കുകയും അടിമവേല ചെയ്യിക്കുകയും ചെയ്ത കേസില് രണ്ടു പാക് പ്രവാസികള്ക്ക് ഖത്തര് കോടതി കടുത്ത ശിക്ഷ വിധിച്ചു. പത്തു വര്ഷം തടവും രണ്ടുലക്ഷം ഖത്തര് റിയാല് പിഴയും ശേഷം നാടുകടത്തലുമാണ് ശിക്ഷ. മനുഷ്യക്കടത്ത് വിരുദ്ധ നിയമപ്രകാരം ഖത്തറിലെ ക്രിമിനല് കോടതിയാണ് പാക് സ്വദേശികളെ ശിക്ഷിച്ചത്.
മനുഷ്യക്കടത്ത് തടയുക എന്ന ലക്ഷ്യംവെച്ച് രാജ്യത്ത് രൂപീകരിച്ച നാഷണല് കൌണ്സില് എഗൈന്സ്റ്റ് ഹുമന് ട്രാഫിക്കിങ്ങിന്റെ റിപ്പോര്ട്ടിന്റെ അടിസ്ഥാനത്തില് എടുത്ത കേസിലാണ് കോടതി നടപടി. സംഭവത്തെപറ്റി സമഗ്രമായ അന്വേഷണം നടത്തിയ സമിതി ദൃക്സാക്ഷി മൊഴികളുടെയും ഇരകളുടെ ശരീരപരിശോധനയുടെയും മറ്റു തെളിവുകളുടെയും അടിസ്ഥാനത്തില് നല്കിയ റിപ്പോര്ട്ട് പരിഗണിച്ച കോടതി, പ്രതികളില് നിന്ന് ഈടാക്കുന്ന രണ്ടു ലക്ഷം റിയാല് ഇരകള്ക്ക് നല്കാനും ഉത്തരവിട്ടിട്ടുണ്ട്.
സംഭവത്തില് ഇരകളായ തൊഴിലാളികളെ പുനരധിവാസ കേന്ദ്രത്തില് പ്രവേശിപ്പിച്ചു. മനുഷ്യക്കടത്ത് തടയുന്നതിനു രൂപീകരിച്ച സമിതിയുടെകീഴില് അല് മഅ്മുറയില് പ്രവര്ത്തിക്കുന്ന പുനരധിവാസ കേന്ദ്രത്തിലേക്കാണ് ഇരകളെ മാറ്റിയത് എന്നാണ് റിപ്പോര്ട്ട്.
മനുഷ്യക്കടത്ത് ഉള്പ്പെടെ പ്രവാസി തൊഴിലാളികള് നേരിടുന്ന വിവിധതരത്തിലുള്ള ചൂഷണങ്ങള് തടയുക എന്ന ലക്ഷ്യം വെച്ച് 2011 ല് തന്നെ ഖത്തര് ശക്തമായ നിയമം കൊണ്ടുവന്നിരുന്നു. ഇത്തരത്തില് ശക്തമായ നിയമം നിലനില്ക്കുന്ന രാജ്യമാണ് ഖത്തര്. ഈ നിയമപ്രകാരമാണ് ഇപ്പോള് പാക് പ്രവാസികള്ക്കെതിരെ ഖത്തര് കോടതി കടുത്ത ശിക്ഷ വിധിച്ചിരിക്കുന്നത്.
