പിണറായി വിജയൻ സിപിഎം ആണോ എന്ന് സംശയമുണ്ടെന്ന് സംവിധായകൻ സനൽകുമാർ ശശിധരൻ. അല്ലെങ്കില് പിന്നെ എങ്ങിനെയാണ് പിണറായി സർക്കാർ കൊണ്ടുവന്ന ഒരു ഓർഡിനൻസ് പാർട്ടിക്ക് അഹിതമായി തോന്നിയതെന്ന് സനൽകുമാർ ഫേസ് ബുക്ക് കറിപ്പിൽ ചോദിച്ചു.
പൊലീസ് നിയമ ഭേദഗതി നിയമം പിൻവലിച്ചതിന് പിന്നാലെയാണ് സനൽകുമാർ പ്രതികരണവുമായി രംഗത്തെത്തിയത്. ഓർഡിനൻസിനെതിരെ നേരത്തെയും സനൽകുമാർ പ്രതിഷേധം അറിയിച്ചിരുന്നു.
പൊതു സമൂഹത്തിൽ നിന്നും രാഷ്ട്രീയ പാർട്ടികളിൽ നിന്നും എതിർപ്പ് രൂക്ഷമായ പശ്ചാത്തലത്തിലാണ് ഓർഡിൻസ് പിൻവലിക്കാൻ സർക്കാർ തീരുമാനിച്ചത്. ഓർഡിനൻസ് പിൻവലിക്കുന്നതായി മുഖ്യമന്ത്രി വാർത്താകുറിപ്പിലൂടെ അറിയിച്ചു.
ഇടതുപക്ഷ ജനാധിപത്യമുന്നണിയെ അനൂകൂലിക്കുന്നവരും ജനാധിപത്യ സംരക്ഷണത്തിനായി നിലക്കൊള്ളുന്നവരും അടക്കം ആശങ്ക പ്രകടിപ്പിച്ച സാഹചര്യത്തില്‍ നിയമ ഭേദഗതി നടപ്പാക്കാന്‍ ഉദ്ദേശിക്കുന്നില്ലെന്ന് മുഖ്യമന്ത്രി വ്യക്തമാക്കി. ഇതുമായി ബന്ധപ്പെട്ട് വിശദമായ ചര്‍ച്ച നിയമസഭയില്‍ നടത്തി എല്ലാ ഭാഗത്തുനിന്നും അഭിപ്രായം കേട്ട് ഇക്കാര്യത്തില്‍ തുടര്‍ നടപടികള്‍ സ്വീകരിക്കുമെന്നും മുഖ്യമന്ത്രി പറഞ്ഞു.
